İslam dinində tövsiyə edilən və sağlamlığa faydaları ilə tanınan hicama terapiyası alternativ müalicə üsulu kimi həm tibbi, həm də dini baxımdan əhəmiyyət daşıyır.İnanc baxımından hicama ənənəvi olaraq sünnətdə qeyd olunan xüsusi günlərdə tətbiq edildikdə daha təsirli sayılır.

Mütəxəssislər bildirirlər ki, hicama üçün ən münasib tarixlər ayın ortasına yaxın günlərdir.

Hicamanın faydaları olduğu kimi zərərləri də varmı?

İnsanların bu terapiyanı etməsi üçün xüsusi ay və ya günə ehtiyac duymalıdır?

Sfera.az bu barədə açıqlama verən tibb elmləri doktoru, professor Adil Qeybulla tibbdə bütün xəstəliklərə çarə olan müalicə üsulunun olmadığını deyib. Həkimin sözlərinə görə, hicama sadəcə qan alma prosedurudur:

“Keçmişdə bu proses əsasən venadaxili həyata keçirilirdi. Bu səbəbdən də bu üsul günümüzdə də bəzən tətbiq edilir. Lakin başqa alternativlər də mövcuddur. Məsələn, venadan qan götürmək, qan yaradan orqanları stimullaşdırmaq, qanda laxtalanma faktorlarının artdığı və toksik maddələrin çoxaldığı hallarda bu metoddan istifadə edilə bilər”.

A.Qeybulla hicamanın alternativlərindən birinin də zəli ilə müalicə olduğunu qeyd edib.

O bildirib ki, zəli bədənə 100-dən çox faydalı ferment ifraz edir:

“Bu fermentlər immun sistemini aktivləşdirir, qanı durulaşdırır və immunomodulyator təsir göstərir. Bu üsul alternativ təbabətdə istifadə oluna bilər, lakin onu hər hansı bir xəstəlik üçün əsas müalicə metodu kimi təqdim etmək doğru yanaşma deyil. Təəssüf ki, bəzi hallarda belə cəhdlər müşahidə olunur. Ümumiyyətlə, yüksək təzyiq, xolesterinin çoxluğu və qan laxtalanması problemləri olan şəxslərdə hicamanın müəyyən müsbət təsiri ola bilər. Bununla belə, qanın tərkibinə təsir edən və daha effektiv nəticə verən dərman preparatları da mövcuddur. Ayın müəyyən günlərində hicama etməyin xüsusi tibbi əsasları yoxdur. Bu, yalnız alternativ təbabət inancına əsaslanır və müasir akademik tibbdə belə bir göstəriş mövcud deyil”.