Bir çox insan üçün 20 yaşlar qayğısız dövrdür - siqaret, spirtli içki və hərəkətsizlik adi hal kimi qarşılanır. Lakin mütəxəssislər xəbərdarlıq edirlər ki, bu həyat tərzinin fəsadları əsasən 36 yaşdan sonra üzə çıxır.

Milli.Az "Telegraph"da dərc olunmuş məqaləni təqdim edir:

Finlandiyada aparılan araşdırmaya görə bu yaşa qədər siqaret və içkinin ciddi təsiri olmasa da, 36-dan sonra sağlamlıqda geriləmələr müşahidə olunur. Xərçəng, ürək və ağciyər xəstəlikləri, depressiya və erkən ölüm riski artır.

Həkimlər bildirirlər ki, bu yaşdan sonra orqanizm artıq zərərli vərdişləri "bağışlamır". Siqareti 35 yaşadək tərgidənlər siqaret çəkməyənlərlə eyni həyat müddətinə sahib ola bilirlər. Lakin 40 yaşdan sonra ağciyər xərçəngi riski xüsusilə kişilərdə sürətlə artır. Alkoqol da bu dövrdə orqanizmə daha çox zərər vurur. Qaraciyər, ürək, təzyiq, diabet və demensiya riski artır.

36-46 yaş arası həm də hormonal dəyişikliklərin baş verdiyi dövrdür. Qadınlarda estrogenin azalması sümük və əzələ itkisinə, immunitetin zəifləməsinə səbəb olur. Kişilərdə isə testosteron azalır, metabolizm zəifləyir. Bu illər həm də insanların daha çox stress yaşadığı, iş və ailə məsuliyyətlərinin artdığı dövrdür ki, bu da sağlamlığa əlavə yük yaradır.

Mütəxəssislər bu onilliyi dəyişiklik üçün ən uyğun dövr hesab edir. Siqareti tərgitmək, spirtli içkini azaltmaq, balanslı qidalanmaq, müntəzəm idmanla məşğul olmaq və keyfiyyətli yuxuya önəm vermək gələcək sağlamlıq üçün vacib addımlardır. Araşdırmalara görə, 36-44 yaş aralığında siqareti tərgidənlər həyatlarına 9 il əlavə edə bilirlər. Qidalanmada şəkər, ağ un və emal olunmuş məhsullardan uzaq durmaq, tərəvəz, meyvə, paxlalılar və fermentləşdirilmiş qidalara üstünlük vermək tövsiyə olunur. Vitamin C, D, B kompleksi, omeqa-3 və maqnezium kimi əlavələr də faydalıdır.

Yuxusuzluq, stress və hormonal pozuntular arasında əlaqə olduğu üçün istirahət və sosial həyat da vacib sayılır. Mütəxəssislər bu yaş aralığını gələcək sağlamlıq üçün həlledici mərhələ hesab edir.