"Türkiyənin regiona daxil olması Rusiyanı qıcıqlandırırdı, amma bu vaxta qədər bunu büruzə vermirdi. Ona görə ki, Moskva bunu özü üçün təhdid hesab etmirdi və düşünürdü ki, müəyyən səviyyədə dayanacaq".
Bunu Milli.Az-a açıqlamasında siyasi elmlər üzrə fəlsəfə doktoru, politoloq Əlimusa İbrahimov deyib.
O bildirib ki, Rusiyanın Şərqi Avropadakı müharibə nəticəsində zəifləməsi onun qorxularını daha çox artırır:
"Son bir ildə Türkiyə ilə Azərbaycan arasında hərbi strateji əməkdaşlıq mənasında çox böyük irəliləyişlər var. Azərbaycan Ordusunun NATO standartlarına çatdırılması qarşıda dayanan məqsədlərdən biridir. 2025-ci ilə kimi Azərbaycan Ordusunda buna nail olmaq məsələsi gündəmdədir.
Son dövrlər hərbi əməkdaşlığımız daha da intensivləşib. Buna misal olaraq son bir ildə iki ölkə hərbiçilərinin iştirakı keçirilən hərbi təlimləri misal göstərmək olar. Ukrayna ilə müharibə nəticəsində Rusiyanın zəifləməsi artıq Türkiyəni də özünə təhlükə hesab etməsinə səbəb olur.
Eyni zamanda Rusiya artıq başa düşür ki, bu, NATO-nun Ukraynada, Gürcüstanda, o cümlədən Moldovada Şərqə doğru irəliləməsinə qarşı mübarizə apardığı halda NATO-nun ən böyük ordusu olan Türkiyə SQ artıq Azərbaycandadır və ona münasibətən heç bir iş görmək, hansısa bir qarşı addım atmaq hazırki vəziyyətdə əlindən gəlmir.
Ətraflı
Bu səbəbdən də Rusiya NATO-nu özünə təhdid, rəqib gördüyü üçün Türkiyə-Azərbaycan münasibətlərini, hərbi əməkdaşlığını qısqanclıqla qarşılayır, eyni zamanda son hadisələr Rusiya üçün bu təhlükənin əsassız olmadığını sübut edir. Ona görə ki, son 1 il ərzində Ermənistan-Azərbaycan münasibətlərinin tənzimlənməsi, sülh müqaviləsinin imzalanması istiqamətində Rusiya hansısa ciddi bir irəliləyişə sahib ola bilməyib.
Azərbaycan da istər Prezident, istər XİN başçısı səviyyəsində nümayiş etdirir ki, Rusiyanın istəyi əsasında hərəkət etmək fikrində deyil, Azərbaycan Ermənistandan fərqli olaraq müstəqil siyasət yürütməyi bacaran, öz maraqlarını müdafiə edən bir dövlətdir.
Əsas da ona görə ki, Azərbaycan Rusiyanın sülhməramlıları vasitəsilə separatçılarla birgə iştirak etdikləri oyunlardan çox yaxşı xəbərdardır. Bu kimi proseslər, məkirli oyunlar təbii olaraq da Azərbaycanı Türkiyə ilə hərbi ittifaqını daha da gücləndirməyə, genişləndirməyə sövq edir".
Qeyd edək ki, Rusiya Xarici işlər nazirinin sözçüsü Maria Zaxarova açıqlama verib ki, Türkiyə ilə Azərbaycan arasında əməkdaşlıq Zaqafqaziyada güc balansını pozmamalıdır.
O növbəti ifadəsində yenidən Azərbaycan-Türkiyə hərbi ittifaqından narahatlığını dilə gətirib: "Bütün ölkələrin digər dövlətlərlə hərbi və hərbi-texniki əməkdaşlığı inkişaf etdirmək hüququ var, lakin bu, üçüncü ölkələrə qarşı yönəlməməlidir".
Xatırladaq ki, bir neçə gün əvvəl Türkiyənin müdafiə naziri Hulusi Akar bildirib ki, məqsəd 2025-ci ilə qədər Azərbaycan Silahlı Qüvvələrini Türkiyə Silahlı Qüvvələri səviyyəsinə çatdırmaqdır.
