Son günlər azyaşlılar və böyüklər arasında yayılan virusun qripin influenza növü olduğu təsdiqlənib. Paytaxtda özəl klinikaya müraciət edən xəstələrdən birində analizlər müsbət nəticə verib. Onun influenza virusuna yoluxduğu məlum olub. Səhiyyə Nazirliyi də sözügedən virusun yayıldığını təsdiqləyib.

Xəstəlik daha çox halsızlıq, qızdırma, şiddətli və uzun müddət davam edən öskürək, boğaz ağrısı ilə müşahidə olunur. Virusun ən ağır əlaməti isə temperaturun bir neçə gün davam etməsidir. Bu hal uşaqlarda ciddi narahatlığa səbəb olur. İmmun sistemi böyüklərlə müqayisədə nisbətən zəif olan uşaqlarda xəstəlik daha ağır formada özünü göstərir. Körpələrdə müşahidə olunan ürəkbulanma, qusma, hətta günlərlə davam edən yüksək hərarət xəstəliyin nə qədər ciddi olduğunu deməyə əsas verir.

Ölkədə geniş yayılan virus haqda Publika.az-a danışan Azərbaycan Tibb Universitetinin Pulmonologiya kafedrasının müdiri, professor Əlizamin Sadıqov bildirib ki, hazırda COVID-19-dan sonra insan sağlamlığı üçün ikinci təhlükəli infeksiya məhz qrip infeksiyasıdır.

“Qrip çox ciddi infeksiyadır. Deməzdim ki, hazırda Azərbaycanda yayılan influenza virusu COVID-19 qədər təhlükəlidir. Çünki influenza elə qrip deməkdir. Bu virus yüz illərdir ki, insanlarımızı narahat edir. Artıq insanlarda bu infeksiyanı qarşılamaq üçün immun yaddaşı var. Buna görə də COVID-19-un iki il öncə yol açdığı acı nəticələri bu infeksiyada yaşamayacağıq. Çünki kifayət qədər insanlar var ki, onlar qripi təkrar-təkrar keçiriblər və bu infeksiyaya yoluxarkən də yüngül keçirəcəklər. Əgər şəxsdə risk faktorları yoxdursa, o zaman influenza virusunu da yüngül keçirir”.

Professorun sözlərinə görə, bu infeksiyanı 6 aylığa qədər olan körpələr vaksin olunmadıqları üçün çox ağır keçirirlər:

“Qrip infeksiyasına qarşı vaksinin 6 aydan sonra, yəni yuxarı yaşlarda insanlara vurulması göstərişdir. Sağlamlıq problemləri və yanaşı xəstəlikləri olan, yaşı 65-dən yuxarı insanların hamısı qrip vaksini olunmalıdır. Təəssüf ki, bu gün qrip vaksininin əhatəliliyi çox aşağıdır. Problem də bundadır. Bizdə çox məhdud halda insanlar qripə qarşı vaksin olunurlar. Ancaq bunu kütləvi etmək lazımdır ki, yoluxduqda ağırlaşmalar olmasın. Bütün Avropa ölkələrində bu gün respirator sinsitial virus (RSV) infeksiyası var, amma onların səhiyyə sistemi bizimki qədər gərginlik yaşamır. Səbəb də odur ki, ölkəmizdə insanlarımızın sağlıq durumuna təsir edə bilən bu vaksinin əhatəliliyi aşağı səviyyədədir. Amma dünyanın çox ölkələrində, xüsusilə də Avropa və Amerika ölkələrində risk qrupunda olan insanların 50-50 faizi qrip vaksini etdiriblər. Bizim aidiyyətin qurumlarımız bu haqda ciddi düşünməlidir. Əks təqdirdə, insanlar qripə yoluxarkən həyatları təhlükə qarşısında qala bilər. Belə halın baş verməməsi üçün qrip vaksininin vurulması təmin edilməlidir. Ola bilər ki, insanların sağlamlıq durumlarında ciddi problemlər olsun və xəstəxanaya yerləşdirilsinlər, buna görə də kritik vəziyyət yaransın. Buna görə də, xüsusi risk qrupuna aid, immun sistemi zəif olan insanlar ehtiyatlı olmalıdırlar”.

Ə.Sadıqov hesab edir ki, Azərbaycanda yayılan influenza virusu fevral ayının sonuna qədər davam edə bilər:

“Bu infeksiyalar əvvəllər aktual deyildi. Son illər Azərbaycanda qorunma tədbirləri çox yaxşı idi. Maska taxmaq, məsafə saxlamaq, əllərin gigiyenası, xəstələnərkən evdə qalmaq kimi zəruri tədbirlərə əməl olunurdu. Hazırda Azərbaycanda bu qaydalara əməl olunmur. Xüsusilə də ictimai nəqliyyatda maskadan istifadə edilmir. Mən bu yaxınlarda iki Avropa ölkəsində - Almaniyada və İspaniyada oldum. Hər kəs tramvayda, metro və avtobuslarda maskadan istifadə edirdi. Düşünürəm ki, Azərbaycanda ən azından ictimai nəqliyyatda, xəstəxanalarda, apteklərdə və insanların sıx olduğu digər məkanlarda insanların maska taxması vacib olmalıdır. Bizim heç COVID-19-un geniş yayıldığı zamanlar bu qədər problemimiz olmadı. Amma bu gün respirator sinsitial virus infeksiyalarının yayılması üçün şərait var. Əvvəllər bu, yox idi. Çünki infeksiyanın yayılmasının qarşısını almaq üçün ciddi tədbirlər görürdük. Bu gün isə biz heç bir qaydaya əməl etmirik, ona görə də sürətlə yayılır”.

Akqabay Mıradov