İnsanlar arasında yeni virus infeksiyası çox geniş yayılıb. Xəstəlik daha çox halsızlıq, qızdırma, şiddətli və uzun müddət davam edən öskürək, boğaz ağrısı ilə müşahidə olunur. İmmun sistemi böyüklərlə müqayisədə nisbətən zəif olan uşaqlarda xəstəlik daha ağır formada özünü göstərir. Körpələrdə müşahidə olunan ürəkbulanma, qusma, hətta günlərlə davam edən yüksək hərarət xəstəliyin nə qədər ciddi olduğunu deməyə əsas verir. Əhalini narahat edən isə az qala hər kəsin yoluxduğu bu xəstəliyin koronovirusun yeni mutasiyası olub-olmadığı ilə bağlıdır. Nəzərə alsaq ki, bir çox ölkədə COVID-19-un yeni dalğası başlayıb, xəstəlik yenidən tüğyan edir. Ümumdünya Səhiyyə Təşkilatı da yeni mutasiya ilə bağlı həyəcan təbili çalıb.

ÜST eksperti Maria van Kerkhove koronavirusun mutasiyaya uğramış yeni forması - “Omikron XBB.1.5” ştamının pandemiyanın növbəti dalğasına səbəb ola biləcəyini açıqlayıb. Onun sözlərinə görə, yeni ştam artıq 29 ölkədə tapılıb. “Biz onun artım tempindən narahatıq, xüsusən də Avropanın bəzi hissələrində və ABŞ-ın şimal-şərqində, burada yeni ştam sürətlə digər dövriyyədə olan alt-variantları əvəz edib”, - deyə ekspert narahatlığını ifadə edib.

Mövzu ilə bağlı Publika.az-a danışan həkim infeksionist Mərdan Əliyev bildirib ki, hazırda Azərbaycanda geniş yayılan virus infeksiyası COVID-19 deyil.

“Çünki xəstələnən şəxslər koronavirus üçün analiz verdikləri zaman testin nəticəsi neqativ olur. Hazırda insanların böyük əksəriyyətinin yoluxduğu mövsümi xəstəlikdir, kəskin respirator virus infeksiyalarındandır. Yəni hamımızın qrip kimi tanıdığı virusdur. Onu 200-ə qədər virus törədir. Bu, qrip, para-qrip və s. ola bilər. Amma tam olaraq hansı virus olduğunu bilmirik. Çünki bizim əlimizdə elə bir imkan yoxdur ki, onu yoxlayaq. Dövlət xəstəxanalarında bunu təyin etmək üçün imkan yoxdur. Yalnız özəl klinikaların bir neçəsində xəstəliyin hansı virus tərəfindən törədildiyini müəyyən etmək üçün analiz vermək mümkündür”.

Həkim qeyd edib ki, xəstəlik boğaz ağrısı ilə tədricən başlayır, daha sonra isə şiddətli hal olur.

“Burun axması, burun tutulması, halsızlıq, ürəkbulanma, bir neçə gün qızdırma olur. Eyni zamanda şiddətli bəlğəmli öskürək olur ki, bu da günlərlə, hətta aylarla davam edə bilir”.

M.Əliyev tövsiyə edib ki, hazırda Azərbaycanda yayılan xəstəlik kəskin respirator virus infeksiyası, yəni tənəffüs yolu xəstəliyi olduğu üçün burada ilk növbədə tənəffüs yollarını qoruyan vasitələrdən istifadə etmək lazımdır:

“Qapalı yerlərdə, xəstəxanalarda, ictimai nəqliyyatda, insanların sıx olduğu məkanlarda maska taxılarsa, yoluxanların sayı da çox olmaz. Gündə iki dəfə - səhər və axşam evin havasını dəyişmək lazımdır. Normal qidalanmaya və yuxu rejiminə əməl olunmalıdır ki, bu da immun sistemini yaxşılaşdıran vasitədir. Hazırda havalar soyuq keçir, buna görə də insanlar özlərini soyuqdan qorumalı, isti maye qəbul etməlidirlər. Digər əlamətlərlə yanaşı, qızdırma da olarsa, bu zaman “Panadol” qəbul etmək olar. Müəyyən miqdarda C vitamini də istifadə etmək olar”.