Karnibahar (Türkiyə türkcəsində) - Karnıbahar(Azərbaycan türkcəsində) – Karnabit (Ərəb dilində) –bracchium (latınca-budaq mənasını verir)- bu kələm növü e.ə. VI-V əsrlərdən İtaliyada becərilib və istifadə edilib. Karnıbahar kələm növüdür və kələm haqqında isə mifologiyada, tarixdə müxtəlif söyləntilər var. Qədim Yunan əfsanəsinə görə şərabçılıq tanrısı Dionis əhatəsindəki müşayiətçilərlə səyahət edərkən, onu sevməyən Likurq tanrıya hücum edir. Tanrı Dionisin ətrafındakılar ölür. Frakiya çarı Likurqu cəzalandırılır, üzüm tənəyi vasitəsiyə döyülür və göz yaşları axıdan çarın gözünün suyundan ağ baş kələmlər bitir. Rus dilində isə “kapusta” adlanan ağ baş kələm, latın d. elə “captum”, yəni baş deməkdir. Həmin vaxtdan kələmlə üzüm tənəyi bir yerdə bitmir. Həm də spirtli içki içməzdən əvvəl kələm yedikdə sərxoşluq olmur, yəni içki təsir etmir. Böyük İskəndər döyüşçülərinə hücumdan əvvəl kələm yeməyi verdirərmiş. Kələm həm qorxu hissini azaldır, həm də gümrahlıq hissi yaradırmış. Bu qidalanma üsulu ilə İskəndər dünyanın yarısını tuta bilmişdi. Qədimdə Almaniyada kələm fala baxmaq vasitəsi olub. Belə ki, baharda evlənmək istəyənlərin adını pıçıldayıb, sonra bostana bir kələm, bir də şalğam əkilərmiş. Əgər hər ikisi bitərmişsə bu evliliyin baş tutmaq ehtimalı böyük imiş, əgər ikisindən biri bitməzdisə bu evlilik fikrindən daşınmalı olublar. Xristianlıqda kələmin istifadəsi kimi, becərilməsi də müqəddəs günlərə təsadüf edir. 7 apreldə Blaqoveşenie günündə toxumlar seçilir, 18 mayda, yəni İrina – fidan, şitil əkmə günündə körpə kələm fidanları yerə əkilir, 27 sentyabr xaç yüksəltmə günündə (Воздвижение Креста Господня) məhsul yığımı başlanar, 8 oktyabrda isə Serqiy Radonejski günündə kələm kəsilərmiş. Qədimdə əksər xəstəliklərdə şəfaverici xüsusiyyətlərinə görə işlədilən karnıbahar,bu gün xərçəng xəstəliyinin müalicəsində də geniş istifadə edilir. Bu bitki nə üçün xüsusi sınanmış günlərdə əkildi və məhz Karnıbahar adlandı? Bu, artıq ayrıca araşdırma mövzusudur.
“Hor sivilizasiyası və onun günümüzdə izləri” kitabından. F. Rüstəmova