FED-in qərarı Azərbaycana birbaşa heç bir təsir etməyəcək.

Redaktor.az bildirir ki, iqtisadçı ekspert Natiq Cəfərli FED-in bu gün açıqlanacaq faiz dərəcələrinin Azərbaycan iqtisadiyyatına təsirlərindən danışıb.

İqtisadçı hesab edir ki, normal iqtisadiyyatı, real ixracı olan ölkələr öz valyutalarının möhkəm və baha olmasını istəmirlər:

“Bu gün FED-in faiz qərarına əsasən çox güman uçot dərəcəsi 0,25% aşağı çəkiləcək. Bu da dünyada ticarət müharibələri ilə yanaşı valyuta müharibələrini də qızışdıracaq. FED-dən sonra dünyanın aparıcı ölkələri də uçot dərəcəsini aşağı çəkəcəklər ki, dollar qarşısında valyutaları bahalaşmasın”.

N. Cəfərli FED-in faiz dərəcələrini aşağı salmasının Azərbaycan iqtisadiyyatına təsirlərinə də toxunub:

“FED-in bu qərarının Azərbaycana təsiri olmayacaq. Çünki Azərbaycanda milli valyuta sabitdir. Ancaq bunun da mənfi təsirləri olacaq. Qısa misalla izah etməyə çalışım: İnsanın immun sistemi sağlam olanda xəstəliklə bədən özü mübarizə aparır, orqanizm özü müqavimət göstərərək xəstəliyə qalib gəlir və xəstəlik zamanı içilən dərmanlar ancaq köməkçi rolu oynayırlar. İmmun sistemi zəif olan orqanizmlər isə daim dərman atırlar ki, xəstələnməsinlər, amma bu da kömək olmur, xəstələnirlər və bu zaman da çox ağır antibiotiklər qəbul etməyə məcbur olurlar. Ağır dərmanlar müvəqqəti effekt yaradır, amma immun sistemi daha da zəiflədir, orqanizmə orta və uzun vadədə ciddi mənfi təsir göstərir.

İqtisadi institutlar ölkələrin immun sistemidir, yaranan problemləri iqtisadi qanunlara uyğun tənzimləyir və həll edir, institutlaşmayan ölkələrdə isə hər problemin həlli dövlət müdaxiləsi tələb edir, bu müvəqqəti effekt yaradır, amma orta-uzun vadədə ölkəyə ciddi ziyan vurur”.

Ekspert hesab edir ki, bu gün manatla bağlı yaranan sabitlik "vurulan antibiotiklə" bağlıdır:

“Yəni orqanik deyil, müvəqqətidir və bu "iynələr" ölkə iqtisadiyyatında immun sisteminin yaranmasına mane olur. Ona görə də orta-uzun vadədə bu "iynələrin" yeri ağrıyacaq, şişəcək, daha ağır əməliyyatla (növbəti gecəlik devalvasiyalar ilə) müdaxilələri qaçılmaz edəcək”.

Xatırladaq ki, bu gün Bakı vaxtı ilə saat 22:00-23:00 arası ABŞ-da FED faiz qərarını açıqlayacaq.