İran kompensasiya müqabilində ABŞ-a Hörmüz boğazının açılmasını təklif edib.

Globalinfo.az xəbər verir ki, bu barədə Səudiyyə Ərəbistanının “Əl-Ərəbiyyə” televiziya kanalı diplomatik mənbələrə istinadən məlumat yayıb.

Məlumata görə, İran ABŞ ilə dolayı danışıqlarda vasitəçilik edən Pakistana iki təklif çatdırıb. İran hakimiyyəti həmçinin hər hansı bir müqavilə imzalamadan əvvəl sanksiyalar və dondurulan aktivlər məsələsini müzakirəyə çıxarmağı təklif edib.

Qeyd edək ki, Pakistan ordusunun feldmarşalı Asim Munir vasitəçilik missiyasına uyğun olaraq Tehrana gəlib. O, artıq İranın xarici işlər naziri Abbas Əraqçi və İran Parlamentinin sədri Məhəmməd Baqir Qalibafla görüşüb. Rəsmi İslamabadın səyləri fikir ayrılıqlarını həll etməyə yönəlib.