Rusiyanın xarici işlər naziri Sergey Lavrovun Ermənistanla bağlı son açıqlamaları birmənalı qarşılanmayıb. Lavrov bildirib ki, Qərb Ukrayna kimi, Ermənistanı da Rusiyaya qarşı səhv məntiqə sövq edir.

Onun sözlərinə görə, Qərb Rusiyanın müttəfiqlərini, ilk növbədə onun qonşularını – Gürcüstan, Moldova, indi Ukrayna ilə olduğu kimi, Ermənistanı da səhv məntiqə sürükləməyə çalışır. Həmçinin Rusiya Təhlükəsizlik Şurasının sədr müavini Dmitri Medvedev də Ermənistan hakimiyyətini hədəf alan bəyanatlar verib.

Rusiya rəsmilərinin açıqlamaları Erməistanda yaxınlaşan seçkilər fonunda narahatlıq doğurub. Analitiklərin fikrincə, bu bəyanatalar Kremlin Cənubi Qafqazda yeni qarşıdurma planının anonsu kimi dəyərləndirilə bilər.

Globalinfo.az-a danışan politoloq Məhəmməd Əsədıllazadə deyib ki, Ermənistanda seçkilər yaxınlaşdıqca Moskvanın İrəvana qarşı siyasi ritorikası kəskinləşir:

“Ermənistanın Baş naziri Nikol Paşinyanla Rusiya Prezidenti Vladimir Putin arasında baş tutan son görüşdə tərəflər arasındakı ziddiyyət açıq şəkildə ortaya çıxmışdı. Moskva Ermənistanda siyasi məğlubiyyətinin fərqindədir. Ona görə də dəstəklədiyi namizədin qələbə əldə etməyəcəyini yaxşı bilir. Paşinyan isə ölkəsini Rusiyadan siyasi cəhətdən uzaqlaşdırmaq üçün əlindən gələni edir. Avropa ilə siyasi münasibətləri inkişaf etdirmək kursu həyata keçirir. Paralel olaraq Rusiyanın orbitində olan təşkilatlarda fəaliyyətini dayandırır.

Kreml İrəvan hökumətininAvropa yönümlü siyasətinə sərt cavab verir. Artıq Ermənistan istehsalı konyakların satışı qadağan olunub. Digər məhsullara da növbəti mərhələdə məhdudiyyət tətbiq edilməsi gözlənilir. Rusiya Ermənistanı iqtisadi cəhətdən cəzalandırmağa başlayır. Lakin Moskvanın bu ölkəyə qarşı siyasəti kobud şəkildə hüquq pozuntusudur. Ermənistan NATO-ya, ya da Avropa İttifaqına daxil olmur. Sadəcə müstəqil siyasət yürütməyə və Azərbaycanla sülh müqaviləsi imzalamağa çalışır. Lakin bu, Rusiyanı qəzəbləndirir.

Düşünürəm ki, Rusiya Ermənistanda siyasi və hərbi təxribatlara getməyəcək. Sadəcə enerji və iqtisadi təzyiqlər göstərəcək. Lavrovun açıqlaması Ermənistanı təhdid etməkdir. Ermənistan Rusiya ilə qonşu ölkə deyil, orada baş verənlər Moskvaya təhdid yaratmır. Sadəcə Ermənistanın əvvəlki rəhbərləri uzun müddət Rusiyaya bağlı olub. İndi isə geosiyasi alətləri əlindən çıxır”.