Rusiya Xarici İşlər Nazirliyinin xüsusi tapşırıqlar üzrə səfiri Rodion Miroşnikin İrəvandakı açıqlaması maraqla qarşılanıb. Kreml rəsmisi bu ölkənin eyni anda həm KTMT və Avrasiya İqtisadi İttifaqı (Aİİ), həm də Avropa İttifaqına (Aİ) üzvlüyünün mümkün olmadığını bildirib.

Miroşnik Aİ və NATO-ya üzv olmaq istəyən Ukraynanı misal göstərərək dolayı yolla Ermənistanı hədələyib.

Rusiyanın Ukraynadan sonra növbəti hədəfi Ermənistan ola bilərmi? Sözügedən xəbərdarlıq nəyə işarədir?

Globalinfo.az-a danışan politoloq Oqtay Qasımov deyib ki, Rodion Miroşnikin İrəvandakı açıqlaması diqqət çəkir:

“Bu sözlər digər Rusiya rəsmilərinin fikirləri ilə eynilik təşkil edir. Xüsusilə son dövrlər Ermənistanın Aİ-yə üzvlük məsələsinin aktuallaşması və konkret addımların atılması Moskvada narahatlıq doğurur. Buna nümunə kimi Ermənistan parlamentinin Aİ-yə inteqrasiya ilə bağlı qanun layihəsini təsdiq etməsini göstərmək olar. Nəticə olaraq Rusiya rəsmilərinin dili ilə İrəvana müəyyən xəbərdarlıqlar edilir.

Ermənistan hakimiyyəti Ukraynadan fərqli olaraq Aİ-yə inteqrasiya prosesini radikal formada deyil, tədricən həyata keçirir. Sanki baş nazir Nikol Paşinyan Rusiyanın nəbzini yoxlayır. Bundan başqa, o, atdığı addımlarla həm də manevr imkanlarını saxlayır. Məsələn, Ermənistan parlamentinin qəbul etdiyi qərar ittifaqa üzvlük niyyətini ehtiva edir”.

Politoloq bildirib ki, hazırda Avropa özü daha ciddi məsələlərlə məşğuldur:

“Rusiyaya qarşı sanksiyalar davam etsə də, Avropanın resursları bu təzyiqə imkan vermir. ABŞ Prezidenti Donald Trampın apardığı siyasət nəticəsində Avropada təhlükəsizliklə bağlı narahatlıqlar var.

Ermənistan tərəfi Aİ-yə üzvlük niyyətinin olduğunu deməklə Rusiyanı sakitləşdirməyə çalışacaq. Digər tərəfdən, Moskvanın İrəvana ciddi təsir imkanları da azdır. Çünki Kremlin prioriteti Ukrayna müharibəsinin öz maraqları çərçivəsində bitməsidir. Bu məsələ yekunlaşdıqdan sonra İrəvana təzyiqlər artırıla bilər. Nəzərə almaq lazımdır ki, Ermənistanda da Rusiyaya münasibəti yaxşı deyil. Xüsusilə 44 günlük müharibə zamanı Moskvanın sərgilədiyi mövqe bu narazılığın əsasını təşkil edir. Rusiya buna görə münasibətlərdə maksimum ehtiyatlı davranır. Ehtimal bir radikal təzyiq üsulu Ermənistandakı anti-Rusiya meyillərini daha da artıra bilər. Onu da deyim ki, İrəvanda Moskvaya sadiq qüvvələr də əvvəlki kimi güclü deyil”.