Prezident İlham Əliyevin Türk Dövlətləri Təşkilatının (TDT) Zirvə görüşündə çıxışı bir çox baxımdan diqqət çəkib. O bildirib ki, Azərbaycan rəqəmsal suverenliyin möhkəmləndirilməsini və innovasiya əsaslı iqtisadiyyata keçidi strateji prioritet hesab edir. Dövlət başçısının sözlərinə görə, bu istiqamətdə həyata keçirilən institusional islahatlar və irimiqyaslı layihələr ölkənin regionun aparıcı rəqəmsal mərkəzlərindən birinə çevrilməsinə xidmət edir.

Prezident həmçinin bu məqsədlə Rəqəmsal İnkişaf Şurası, Milli Süni İntellekt Mərkəzi və Süni İntellekt Akademiyasının yaradıldığını, ötən il isə Azərbaycanın Süni İntellekt Strategiyasının qəbul olunduğunu vurğulayıb. Eyni zamanda, ölkədə sabit genişzolaqlı internetin əhatə dairəsi 100 faizə çatdırılıb. Bu da region üzrə ən yüksək göstəricilərdən biri hesab olunur.

İlham Əliyev əlavə edib ki, Avropa ilə Asiya arasında “Rəqəmsal İpək Yolu” layihəsi çərçivəsində Azərbaycan ilə Qazaxıstan arasında Trans-Xəzər Fiber-Optik Kabel xəttinin yaxın aylarda istifadəyə verilməsi planlaşdırılır. Layihə regionda məlumat axınının təhlükəsizliyinin və rəqəmsal bağlantıların gücləndirilməsi baxımından strateji əhəmiyyət daşıyır.

Globalinfo.az-a danışan deputat Hikmət Babaoğlu deyib ki, rəqəmsal inkişaf və süni intellekt texnologiyaları yeni iqtisadi münasibətlərin əsas trendinə çevrilib.

“Rəqəmsal inkişaf gələcəyin iqtisadi modelini formalaşdıran əsas istiqamətlərdən biridir. Süni intellektlə rəqəmsal inkişafın qarşılıqlı əlaqəsi bu prosesi daha da aktuallaşdırır. Azərbaycan da öz iqtisadi gələcəyini bu texnologiyaların iqtisadiyyata və cəmiyyətin müxtəlif sahələrinə tətbiqi üzərində qurur.

Bu məqsədlə ölkədə rəqəmsal inkişaf strategiyası hazırlanıb, Rəqəmsal İnkişaf Şurası yaradılıb. Eyni zamanda, Milli Süni İntellekt Mərkəzi və Süni İntellekt Akademiyası təsis olunub. Bütün bunlar dövlət proqramları çərçivəsində institusional əsasda həyata keçirilir.

Deputat bildirib ki, rəqəmsal inkişaf təkcə bir sahəni əhatə etmir:

“Bu proses idarəetmədən elektron hökumətə, iqtisadiyyatın optimallaşdırılmasından innovativ texnologiyaların tətbiqinə qədər geniş spektri əhatə edir. Təbii ki, bunun üçün peşəkar kadr bazasının formalaşdırılması da xüsusi əhəmiyyət daşıyır.

Azərbaycan artıq sabit genişzolaqlı internetin əhatə dairəsini 100 faizə çatdırıb. Eyni zamanda ölkəmiz Avropa ilə Asiya arasında rəqəmsal körpü yaradır. Bu təşəbbüs “Rəqəmsal İpək Yolu” kimi böyük strateji əhəmiyyət daşıyır.

Türk Dövlətləri Təşkilatının Qazaxıstanda keçirilən Zirvə görüşündə rəqəmsal inkişaf Türk dünyasının gələcək inkişaf modelinin əsas istiqamətlərindən biri kimi müəyyən edildi. Trans-Xəzər Fiber-Optik Kabel xəttinin çəkilməsi də məhz bu strateji yanaşmanın mühüm tərkib hissəsidir.

Prezident İlham Əliyevin Zəngilanın gələcəkdə böyük regional mərkəzə çevriləcəyi ilə bağlı fikirləri də göstərir ki, Azərbaycanın sosial-iqtisadi inkişaf modelində rəqəmsal transformasiya əsas rol oynayacaq”.