“Politico” Ağ Evin Kubada mövcud hökuməti devirmək üçün hərbi əməliyyat planını nəzərdən keçirdiyini yazıb.

Məlumata görə, ABŞ Prezidenti Donad Tramp Ağ Evin Kubanı dərhal öz nəzarətinə alacağını bildirib. O, bundan əvvəl də Vaşinqtonun İrana qarşı hərbi əməliyyatı başa çatdıqdan sonra Kuba ilə bağlı əlavə tədbirlər planı hazırlamaq niyyətində olduğunu açıqlamışdı.

Globalinfo.az-a danışan politoloq Bakir Həsənbəyli deyib ki, Vaşinqton mövcud hakimiyyəti devirmək üçün Kubada hərbi əməliyyatın keçirilməsi ehtimalını istisna etmir, lakin hələlik diplomatik vasitələrə üstünlük verilir:

“ABŞ Kuba hakimiyyətindən dövlət müəssisələrinin özəlləşdirilməsi, xarici investisiyaların rolunun artırılması və ölkə vətəndaşları arasında internetə çıxışın genişləndirilməsi, həmçinin Amerika enerji daşıyıcılarının idxalı daxil olmaqla iqtisadi islahatların həyata keçirilməsini tələb edir. Vaşinqton Havanaya hakimiyyətin tamamilə dəyişməsi üçün vaxt versə də, bəzi rəsmi şəxslərin dərhal istefasını istəyir.

ABŞ Prezidenti Donald Tramp İrana qarşı aparılan hərbi əməliyyatların başa çatmasından sonra Kubaya münasibətdə sonrakı fəaliyyət kursunun hazırlanması ilə məşğul olmaq niyyətindədir. ABŞ-ın təzyiqi altında Venesueladan ada dövlətinə neft tədarükünün dayandırılmasından sonra Kuba hökumətinin və iqtisadiyyatının süqut etməyə yaxın olduğu iddia edilir. Birləşmiş Ştatlar Kuba üzərində nəzarət funksiyasını həyata keçirmək istəyir. Bu səbəbdən ölkə hazırda çətinlik çəkir”.