“Türkiyənin hava məkanının və sərhəd təhlükəsizliyinin qorunması baxımından dövlətimizin iradəsi və imkanları ən yüksək səviyyədədir”.

Globalinfo.az xəbər verir ki, bunu Türkiyə Prezident Administrasiyasının Kommunikasiyalar İdarəsinin rəhbəri Burhanettin Duran İrandan ölkəsinə ballistik raket atılmasına münasibət bildirərkən deyib.

O qeyd edib ki, bu çərçivədə Milli Müdafiə Nazirliyi başda olmaqla bütün aidiyyəti qurumlar tam koordinasiya ilə hərəkət edir:

“Türkiyənin hava məkanının və sərhəd təhlükəsizliyinin qorunması baxımından dövlətimizin iradəsi və imkanları ən yüksək səviyyədədir. Regiondakı gərginliyin daha da artmaması və münaqişələrin daha geniş ərazilərə yayılmaması böyük əhəmiyyət daşıyır. İran da daxil olmaqla bütün tərəflərə bir daha güclü şəkildə xəbərdarlıq edirik ki, regional təhlükəsizliyi riskə atan və mülki şəxsləri təhlükəyə sala biləcək hərəkətlərdən uzaq dursunlar.

Bu prosesdə vətəndaşlarımızdan və media qurumlarından xahiş edirik ki, təsdiq olunmamış, ictimaiyyəti təşvişə sala biləcək və dezinformasiya ehtiva edən məzmunlara qarşı diqqətli olsunlar və yalnız rəsmi orqanlar tərəfindən verilən açıqlamalara əsaslansınlar”.