Türkiyə prezident administrasiyası ABŞ-ın Ankaraya F-16 satmaq üçün şərtlərinin olduğu iddia edilən xəbərləri təkzib edib.

Publika.az xəbər verir ki, bu barədə Türkiyə Respublikası Prezidenti Administrasiyasının Kommunikasiyalar Müdirliyi yanında Dezinformasiya ilə Mübarizə Mərkəzinin bəyanatında deyilir.

Bundan əvvəl Türkiyənin bir sıra müxalifət mediası F-16-ların Türkiyəyə satışının şərtlərdən, xüsusən də Yunanıstana qarşı istifadə olunmayacağından asılı olduğunu yazıb.

“Yanvarın 26-da Hərbi Hava Qüvvələri komandanlığının ehtiyaclarına uyğun olaraq 40 ədəd yeni F-16 Blok-70 təyyarəsinin alınması və 79 ədəd mövcud F-16-nın modernləşdirilməsi üçün ABŞ Konqresinin təsdiqi prosesi başladı. Müvafiq təyyarə üçün döyüş sursatı, material və avadanlıqla bağlı sorğular verildi. Təklif və qəbul məktubları alındıqdan sonra iş qrafikə uyğun başlanacaq... F-16-nın alınması və modernləşdirilməsi heç bir şərtə tabe deyil”, - deyə məlumatda bildirilir.

Media daha əvvəl yazmışdı ki, Vaşinqton administrasiyası Konqresdən F-16 qırıcıları və müvafiq avadanlıqların Türkiyəyə ümumilikdə 20 milyard dollarlıq satışını təsdiqləməyi xahiş edib. Bu nəşrləri şərh edən Dövlət Departamentinin mətbuat xidmətinin rəhbərinin müavini Vedant Patel bildirib ki, bu məsələdə əsas rol Konqresə həvalə olunub.

Türkiyə daha əvvəl İsveçin NATO-ya üzvlüyünü rəsmən təsdiqləmişdi - bu, ABŞ administrasiyasının F-16 müqaviləsi ilə bağlı "müsbət inkişaf" üçün qoyduğu əsas şərtdir.

Tural