Türkiyə prezidenti Rəcəb Tayyib Ərdoğan Səudiyyə Ərəbistanına səfər edib. Səfər çərçivəsində Ərdoğan Səudiyyə Ərəbistanının vəliəhdi Məhəmməd bin Salmanla görüşüb və iki ölkə arasında 2 milyard dollarlıq günəş enerjisi layihəsi də daxil olmaqla dörd müqavilə imzalanıb.

Publika.az "Milliyet"ə istinadən xəbər verir ki, Ərdoğanın bu səfəri İsrail mətbuatında geniş işıqlandırılıb.

"Maariv" qəzeti "Yaxın Şərq Zirvəsi: Türkiyə cənub arenasında təsirini genişləndirir" başlıqlı məqaləsində bildirib ki, Qahirədə davam etməsi gözlənilən bu səfər Türkiyə, Səudiyyə Ərəbistanı və Misiri əhatə edən üçtərəfli təhlükəsizlik oxu yarada bilər. Həmçinin qeyd olunub ki, təhlükəsizlik məsələləri qarşısında regional koordinasiya liderlərin gündəliyində olacaq.

"Makorrishon" nəşri bu xəbəri "Ərdoğanın genişmiqyaslı diplomatik addımı" başlığı ilə yayımlayıb. "İki ölkə arasındakı bu yaxınlaşma Qəzza və Suriya ətrafında əməkdaşlıq və mümkün razılaşmadan əvvəl Türkiyənin Vaşinqtonla Tehran arasında vasitəçilik etmək cəhdini əhatə edir. Ankara Səudiyyə Ərəbistanı ilə Pakistan arasında yaradılacaq qarşılıqlı müdafiə ittifaqında iştirak etməyəcəyini demişdi. Lakin Ərdoğanın buradan Qahirəyə getməsi “yeni üçlü ittifaq yaranırmı?” sualını ortaya çıxarıb", - nəşr bildirib.

“Times of Israel” qəzeti “İki ölkə arasında münasibətlər istiləşir” başlıqlı məqaləsində bildirib ki, Ankara Ər-Riyadla sərbəst ticarət müqaviləsi danışıqlarını yekunlaşdırmaq istəyir: "Tərəflər neft, neft məhsulları, neft-kimya və bərpa olunan enerji sahələrində əməkdaşlığı artırmaq barədə razılığa gəliblər. Türkiyə ilə Səudiyyə Ərəbistanı arasındakı münasibətlər son illərdə davamlı olaraq bərpa olunub və iki ölkə müxtəlif diplomatik məsələlərdə möhkəm əməkdaşlıq edir".

Məqalədə bu səfərin Təl-Əviv dairələrində də müzakirə olunduğu qeyd edilib: “Türkiyə ilə Səudiyyə Ərəbistanı arasındakı hər hansı bir yaxınlaşma bölgədəki digər rəqiblərə, xüsusən də İsrailə xəbərdarlıqdır. Təl-Əviv bu əməkdaşlıqlar qarşısında tarazlığı qorumaq üçün müttəfiqləri ilə yeni yollar axtarmalıdır".

Qeyd edək ki, Ərdoğanın Səudiyyə Ərəbistanının paytaxtı Ər-Riyaddakı görüşlərindən sonra Türkiyə ilə Səudiyyə Ərəbistanı arasında 31 maddəlik birgə bəyanat verilib. Məlumata görə, hər iki tərəf iki ölkə arasında iqtisadiyyat, ticarət və investisiya sektorlarında iqtisadi əlaqələrin gücünü yüksək qiymətləndirib və bu əlaqələrin gücləndirilməsinin vacibliyi barədə razılığa gəliblər.