Türkiyə Prezidenti Rəcəb Tayyib Ərdoğan bu gün 3 günlük Körfəz turuna çıxır. Ərdoğan, müvafiq olaraq Səudiyyə Ərəbistanı, Qətər və Birləşmiş Ərəb Əmirliklərinə səfər edəcək və həmkarları ilə görüşəcək.
Publika.az xəbər verir ki, Ərdoğan iyulun 20-də Şimali Kipr Türk Respublikasına da səfər edəcək.
Ciddədə Prezident, Səudiyyə Ərəbistanı kralı Salman bin Əbdüləziz əs-Səud və vəliəhd şahzadə Məhəmməd ibn Salmanla görüşəcək.
Prezident Ərdoğan Səudiyyə Ərəbistanından Qətərə gedəcək. O, 8 aylıq fasilədən sonra gedəcəyi Dohada Qətər əmiri Şeyx Təmim bin Həməd Al Sani ilə görüşəcək.
Ərdoğanın Körfəz turunda son dayanacağı Birləşmiş Ərəb Əmirlikləri olacaq. Prezident çərşənbə günü Əbu-Dabidə Birləşmiş Ərəb Əmirliklərinin prezidenti Şeyx Məhəmməd bin Zayed Al Nəhyanı ilə görüşəcək.
Prezident Ərdoğanın bəzi nazirlər və iş adamları ilə səfərləri zamanı mövcud əlaqələrin daha da gücləndirilməsi istiqamətində atılacaq addımlar müzakirə olunacaq. Xüsusilə, yeni iqtisadi əməkdaşlıq imkanları müzakirə ediləcək. Bu çərçivədə Türkiyənin hər üç ölkə ilə müxtəlif sahələrdə müqavilələr imzalaması gözlənilir.
3 günlük Körfəz turundan sonra Ərdoğan Şimali Kipr Türk Cümhuriyyətinə gedəcək. Lefkoşada tikintisi başa çatan Yeni Ercan Hava Limanı Kipr Sülh Əməliyyatının ildönümündə istifadəyə veriləcək.
Nəzrin