ABŞ prezidenti Donald Tramp Qrenlandiyanın hərbi yolla ələ keçirilməsi ilə bağlı planlarını dəyişdirib.

Publika.az xəbər verir ki, bu barədə "Reuters" məlumat yayıb.

Bildirilib ki, Trampın son vaxtlar Qrenlandiya ilə bağlı sərt çıxışları ABŞ liderinə qarşı impiçment ehtimalını artırıb.

Məlumata görə, bu çıxışlar ABŞ daxilində və Vaşinqtonun müttəfiqləri arasında həyəcan siqnalına səbəb olub. Demokratlar və bəzi Respublikaçılar Venesueladakı hadisələrdən sonra Tramp administrasiyasının Konqreslə məsləhətləşmədən yenidən böyük hərbi əməliyyata başlaya biləcəyindən narahatdırlar.

Hətta qanunvericilər dövlət katibi Marko Rubioya və Ağ Evin digər rəsmilərinə zəng ediblər. Onlar narahatlıqlarını bildirərək, administrasiyaya gələcək tədbirlər barədə məsləhət veriblər.

Respublikaçılar Tramp administrasiyasına xəbərdarlıq ediblər ki, Konqres üzvləri Qrenlandiyaya hərbi müdaxilə olarsa, prezidenti impiçment edə bilərlər.

Qeyd edək ki, yanvarın 21-də ABŞ prezidenti Donald Tramp Davosda NATO-nun baş katibi Mark Rutte ilə keçirdiyi görüşdən sonra Qrenlandiya və bütövlükdə Arktika bölgəsinin gələcəyi ilə bağlı razılaşma üçün çərçivə yaradıldığını açıqlayıb. O, bu razılaşma çərçivəsində 1 fevralda qüvvəyə minməsi planlaşdırılan gömrük tariflərinin tətbiq edilməyəcəyini bildirib.