Uçuşdan əvvəl qorumaq məqsədilə baqajın şəffaf plyonka ilə bükdürən sərnişinlər cərimə oluna bilər.
Bakupost.az “Der Spiegel”ə istinadən xəbər verir ki, Avropa Birliyinin yeni ekoloji siyasəti çərçivəsində hava limanlarında geniş istifadə olunan şəffaf baqaj plyonkası mərhələli şəkildə qadağan ediləcək.
Şəffaf plastikdən hazırlanan və baqajların ətrafına sıx şəkildə sarılan bu plyonka uzun illərdir zədələnmənin, oğurluğun və müdaxilənin qarşısını almaq üçün istifadə olunurdu. Lakin onun birdəfəlik plastikdən istehsal edilməsi və təkrar emalın qeyri-mümkünlüyü ekoloji baxımdan ciddi problem kimi qiymətləndirilib.
Qərar Avropa Birliyinin qablaşdırma tullantılarının azaldılmasını hədəfləyən tənzimləməsinə əsaslanır. Sənəddə hava limanlarında istifadə olunan birdəfəlik plastik qablaşdırmalar, o cümlədən baqaj və çantaların plyonka ilə sarılması açıq şəkildə qadağa obyektləri sırasında göstərilir.
Planlara əsasən, qadağa 2027-ci il dekabrın 31-dək mərhələli şəkildə tətbiq olunacaq. 2030-cu il yanvarın 1-dən etibarən isə tamamilə dayandırılacaq.
Baqajını qorumaq istəyənlər üçün alternativ həllər təklif olunur. Bunlara möhkəm baqaj kəmərləri və TSA (Transportation Security Administration) kilidləri daxildir. TSA kilidləri gömrük əməkdaşlarının xüsusi açarla baqajı zədələmədən açmasına imkan verir.
Cızılmalardan qorunmaq üçün isə təkrar istifadə edilə bilən baqaj örtükləri də çıxış yollarından biridir. Bu məhsullar həm ekoloji baxımdan uyğundur, həm də uzunmüddətli istifadədə daha sərfəli hesab olunur.
Bəzi hava limanları Avropa Birliyinin rəsmi təqvimini gözləmədən plyonka tətbiqini tamamilə dayandırıb. Bu qərarı verən Hannover Hava Limanı rəsmilər bildirirlər ki, plyonka baqaj daşıma sistemində nasazlıqlara, yükləmə zamanı texniki problemlərə və tullantıların idarə olunmasında ciddi çətinliklərə səbəb olur.
Hava limanı nümayəndəsinin sözlərinə görə, qadağaya əsas səbəblər artan tullantı həcmi, ekoloji yük və əməliyyat riskləridir.
Qeyd olunur ki, yaxın illərdə plyonkanın tamamilə dövriyyədən çıxarılması ilə sərnişinlər alternativlərə yönəlmək məcburiyyətində qalacaq.