Azərbaycan ölkəmizdə cəza çəkən dörd erməniəsilli şəxsi - Vaqif Xaçaturyan, Gevorq Sujyan, David Davtyan və Viqen Euljekjyanı Həkəri çayı üzərindəki körpüdə müvafiq Ermənistan qurumlarının nümayəndələrinə təhvil verib.

Ailehekimiklinikasi.az teleqraf-a istinadən xəbər verir ki, Rəsmi Bakı bu addımı Azərbaycan və Ermənistan arasında əldə olunmuş ikitərəfli razılığa, humanizm prinsiplərinə uyğun olaraq atsa da, sosial şəbəkələrdə mənəvi tərəfdən müzakirələrə səbəb olub.

Aydın məsələdir ki, Azərbaycan uzun illər erməni təcüvüzündən əziyyət çəkib, 30 ilə yaxın müddətdə torpaqlarımız işğal altında olub və bunun nəticəsində bir milyon soydaşımız məcburi köçkün həyatı yaşayıb.

2020-ci ildə isə Prezident, Ali Baş Komandan İlham Əliyevin rəhbərliyi ilə Azərbaycan ordusu işğala son qoyub və 44 gün ərzində dədə-baba torpaqlarını erməni tapdağından azad edib.

Bunun davamında isə başımıza gətirilən bu müsibətlərdə iştirak edənlərin məsuliyyətə cəlb olunmasına başlanılıb. Çoxları inanmasa da, Azərbaycan hüquq-mühafizə orqanları bu prosesdə çox titiz işləyərək, həmin şəxslərin tutulub Bakıya gətirilməsinə, davamında isə Azərbaycan məhkəmələrində hakim qarşısına çıxarılmasına nail olub.

İndiki məqamda sual yaranır: Rəsmi Bakı yuxarıda adları çəkilən 4 nəfəri niyə təhvil verdi?

Ən müzakirə olunan ad təbii ki, Meşəli hadisələrində iştirakı bilinən və 15 il müddətinə azadlıqdan məhrum edilən Vaqif Xaçaturyandır.

Bu o Xaçaturyan idi ki, 2023-cü ilin oktyabarıda Bakıda keçirilən məhkəmələrdə ağlamış, Azərbaycan xalqından üzr istəmişdi. Və o, ümumiyyətlə, 30 il sonra törətdiyi əməllərə görə məsuliyyətə cəlb olunacağını ağlının ucundan belə keçirmirdi. Amma Azərbaycan göstərdi ki, bu dövlət ona qarşı yanlış edənləri, onların üzünü, əməllərini heç vaxt unutmur və unutmağa da imkan vermir. Nəticədə keçirilmiş axtarış tədbirləri nəticəsində 29 iyul 2023-cü il tarixdə Vaqif Xaçaturyan Beynəlxalq Qırmızı Xaç Komitəsinin vasitəçiliyi ilə müalicə almaq adı altında Ermənistana getmək istəyərkən Dövlət Sərhəd Xidmətinin hərbi qulluqçuları tərəfindən Azərbaycan-Ermənistan dövlət sərhədinin Laçın sərhəd-keçid məntəqəsində saxlanıldı. Bakıya gətirildi, istintaqa cəlb olundu, məhkəməyə çıxarıldı və bu xalqdan üzr istədi.

Vaqif Xaçaturyanın bu yaşda ağlaması, üzr istəməsi tarixi ədalətin bərpası idi. İndi isə hazırda 70 yaşı olan Xaçaturyanın ömrünün sonuna bir şey qalmayıb, bəlkə də sayılı günlər...

Belə ki, 2025-ci ilin dekabrında Vaqif Xaçaturyanın səhhətində pisləşmə müşahidə edilib, təngnəfəslik və ürək nahiyəsində ağrıları yaranıb. Nəticədə Ədliyyə Nazirliyinin Tibb baş idarəsinin tibb-sanitariya hissəsinin həkimi tərəfindən ilk həkim yardımı göstərilib və təcili olaraq ambulansla Ədliyyə Nazirliyinin Müalicə müəssisəsinə təxliyə edilib. Orada intensiv müalicə və reanimasion tədbirlər görülüb, lakin vəziyyətində nəzərəçarpan müsbət dinamika müşahidə edilmədiyindən Yeni Klinikanın Reanimasiya şöbəsinə yerləşdirilib.

Rəsmi diaqnoz isə belədir:

Vaqif Xaçaturyan Yeni Klinikanın Reanimasiya şöbəsinə ciddi dərəcədə ağır aortal stenoz, orta dərəcəli mitral stenoz və xroniki ürək çatışmazlığının dekompensasiyası fonunda inkişaf etmiş ağciyər ödemi və ağır tənəffüs çatışmazlığı diaqnozu ilə kritik vəziyyətdə qəbul olunub. Kritik həyati təhlükə mərhələsindən çıxsa da, vəziyyəti ağır olaraq qiymətləndirilir.

Göründüyü kimi, Azərbaycan dövləti humanist davranaraq ağır vəziyyətdə olan Xaçaturyanı Ermənistana təhvil verib. Onun burada ölməsi nəyi dəyişdirəcəkdi ki? O zatən Laçında Azərbaycan tərəfindən tutulanda, Bakıya gətiriləndə, məhkəmə qarşısına çıxarılanda, başına müsibətlər gətirdiyi xocalıların qarşısına hönkür-hönkür ağlayıb üzr istəyəndə, zatən ölüb-bitmişdi, hətta yerə girmişdi...

Bəs, onunla yanaşı Ermənistan təhvil verilənlər kimlərdir?

Gevorq Sujyan - Ermənistanda dövlətə bağlı müxtəlif ictimai təşkilatların rəhbəri olmuş bu şəxs Vətən müharibəsi zamanı Kəlbəcərə getmiş və İstisuda dincəlməsi barədə video çəkərək, sosial şəbəkələrdə paylaşmışdı. O, həmin videoda tezliklə Bakıya çatıb, Xəzərdə üzəcəyini bildirmişdi. Ən maraqlısı odur ki, bu hadisədən bir neçə gün sonra Gevorq Sujyan yoxa çıxır, daha sonra isə Ermənistanın Milli Təhlükəsizlik Xidməti onun yerinin müəyyən olunması istiqamətində axtarışlara başlayır.

Sonradan məlum olur ki, Gevorq Sujyan Bakıdadır - "çimir"... Onu Azərbaycanın xüsusi xidmət orqanları Bakıya gətirib. Bu qorxunun özü Sujyana bir ömür bəsdir!

Vigen Eulcekyan - birgə yaşadığı Maral Nacaryan adlı livanlı qadınla 2020-ci ildə imzalanmış 10 noyabr tarixli bəyanatdan sonra Qarabağda saxlanılıb. Onlar Azərbaycan ərazisinə qanunsuz daxil olub və ölkəmizin qanunvericiliyini pozan digər hərəkətlərə yol veriblər. Saxlanıldan sonra Vigen Eulcekyan 20 il müddətinə azadlıqdan məhrum edilib. Maral Nacaryan isə Azərbaycan tərəfinin nümayiş etdirdiyi humanizm nəticəsində 2021-ci ilin martında azadlığa buraxılıb.

Davtyan David isə - Azərbaycana qarşı casusluqda ittiham olunub. Gevorq Sujyanla birlikdə ittiham olunan David məhkəmədə mərhəmət istəyiblər. David məhkəməsində son söz deyən zaman ağlayıb və məhkəməyə bildirib ki, xəstə anasının ona ehtiyacı var. Hökmə əsasən casusluqda ittiham olunan ermənilərin hər biri 15 il müddətinə azadlıqdan məhrum edilmişdi.