Azərbaycan universitetlərinin “Məzun günü” tədbirləri sosial şəbəkələrdə geniş müzakirələrə səbəb olub. Xüsusilə dəvət edilən müğənnilərin siyahısı tənqidlə qarşılanıb. Bildirilir ki, belə tədbirlər yüksək xərclər tələb edir və bu, israflıqdan başqa bir şey deyil. Bəziləri isə bu cür mərasimləri tələbələrin motivasiyası kimi dəyərləndirir.

Məzun günündə tanınmış ifaçıların çıxışları universitetin imicinə və tələbələrin motivasiyasına necə təsir edə bilər? Bu cür tədbirlərə vəsait ayrılması doğrudurmu?

Globalinfo.az-a danışan təhsil eksperti Kamran Əsədov xatırladıb ki, ötən il 10-dan çox dövlət və özəl universiteti dəbdəbəli “Məzun günü” tədbirləri keçirib:

“Bu məqsədlə 20 min manatdan 80 min manata qədər vəsait xərcləndi. Tələbələr və valideynlər haqlı narazılıq etdi. Bəzi hallarda pulun bir hissəsinin tələbələrin “könüllü” ödəmələri hesabına toplandığı da bildirilmişdi. Bu isə şəffaflıq prinsipinə ziddir və etik baxımdan problematikdir. Məzun gününə tanınmış müğənnilərin dəvət olunması universitetin imicinə qısamüddətli vizual və emosional effekt verir. Bu cür tədbirlər ictimai diqqət cəlb edir, gələcək abituriyentlər üçün bir növ cazibə vasitəsinə çevrilir. Tələbələrin motivasiyası baxımından da tədbirlərin emosional və simvolik əhəmiyyəti var. Lakin önəmli məsələ onların balanslı və məzmunlu təşkilidir. Universitet yalnız əyləncə platformasına çevrilməməli, bu tədbirlərin elmi, ictimai və pedaqoji konteksti də qorunmalıdır”.

Ekspert bildirib ki, tədbir yalnız musiqi və şou ətrafında qurulan zaman universitet ticarət və əyləncə platformasına çevrilmiş olur:

“Bu, xüsusilə elmi fəaliyyətə və akademik nailiyyətə deyil, səhnə effektinə üstünlük verilməsi kimi yozula bilər. Belə hal uzunmüddətli perspektivdə ali təhsil müəssisənin strateji dəyərlərinə ziddir. Tələbələr motivasiya axtarışını səhnə parıltısında deyil, universitetin verdiyi bilik, yaratdığı şərait və qazandırdığı dünya baxışında tapmalıdır. Məzun tədbirlərinə vəsait ayrılması qadağan edilməli deyil, lakin istifadəsi şəffaf, balanslı və təhsilin ümumi prinsiplərinə uyğun həyata keçirilməlidir. Gələcəkdə məzun günləri daha çox elmi və sosial məzmunla zənginləşdirilməli, əyləncə komponenti isə ölçülü və simvolik səviyyədə saxlanılmalıdır”.

Qeyd edək ki, universitetlərin məzun günlərində bu müğənnilər iştirak edəcəklər:

Bakı Mühəndislik Universiteti – Röya Ayxan

Azərbaycan Dövlət Neft və Sənaye Universiteti – Aygün Kazımova

Azərbaycan Texniki Universiteti – Faiq Ağayev

Azərbaycan Texnologiya Universiteti – İlqar Muradov

Azərbaycan Dövlət İqtisad Universiteti – Murad Arif

Bakı Dövlət Universiteti – Miri Yusif, Orxan Zeynallı

Azərbaycan Memarlıq və İnşaat Universiteti – Orxan Zeynallı, Mərdan Kazımov

Naxçıvan Dövlət Universiteti – Mərdan Kazımov.