Rusiya Prezidenti Vladimir Putin strateji çəkindirmə (və ya nüvə) qüvvələrinin təlimində iştirak edir.

Teleqraf xəbər verir ki, dövlət başçısı Baş Qərargahla Kremldən təmas qurur.

TASS bildirib ki, Strateji Çəkindirmə Qüvvələri Rusiya Silahlı Qüvvələrinin bir hissəsidir:

“Onlar Rusiya Federasiyası və onun müttəfiqlərinə qarşı təcavüzün qarşısını almaq, həmçinin müxtəlif növ silahlar, o cümlədən nüvə silahından istifadə etməklə təcavüzkarı məğlub etmək məqsədilə nəzərdə tutulub. Strateji Çəkindirmə Qüvvələrinə Strateji Hücum Qüvvələri (SHQ) və Strateji Müdafiə Qüvvələri (SMQ) daxildir.

Uzaqmənzilli raket və aviasiya kompleksləri, eləcə də yüksək dəqiqlikli uzaqmənzilli silahlarla təchiz olunmuş SHQ-nun əsasını Strateji Nüvə Qüvvələri (SNQ – “Nüvə Triadası”) təşkil edir. SMQ isə Aviakosmik Müdafiə Qoşunlarının döyüşə hazır qüvvə və vasitələrindən ibarətdir; bura raket hücumu barədə xəbərdarlıq sistemi, kosmik məkanın nəzarət sistemi, raket əleyhinə və kosmosa qarşı müdafiə sistemləri, həmçinin hava hücumundan müdafiə sistemi daxildir.

Strateji Nüvə Qüvvələrinin formalaşması 1950-ci illərdə başlanıb. Hazırda onların əsas silahlanmasını stasionar və mobil quru bazalı qitələrarası ballistik raket kompleksləri (QBR), strateji atom sualtı gəmiləri (ASG), eləcə də “hava–yer” sinifli strateji qanadlı raketlər və aviabombalarla təchiz edilmiş strateji bombardmançılar təşkil edir”.