Azərbaycanda ev telefonlardan istifadənin sürətlə azalması sosial mediada müzakirə yaradıb. Bildirilir ki, proses kütləvi imtina və ya ümumiyyətlə bunun ləğvi ilə yekunlaşa bilər.

Qeyd edək ki, ötən il ölkədə sabit şəbəkə telefonlarının ümumi sayı 1 milyon 175 min olub. Onlardan 1 milyon 95 min 200-ü mənzillərdəki telefonlara aiddir. Halbuki, 2023-cü ildə bu göstərici 1.4 milyondan çox olub. Deməli, cəmi bir il ərzində 230 minə yaxın insan ev telefonundan imtina edib.

Texnoloji dəyişikliklərin sosial davranışa təsiri hansı səviyyədədir? Məsələ uzunmüddətli sosial və təhlükəsizlik problemlərinə yol aça bilərmi?

Globalinfo.az-a danışan sosioloq Lalə Mehralı deyib ki, hələ də ev telefonlarından istifadə edənlər var:

“Məsələn, bəzi valideynlər smartfonu olmayan övladları ilə gün ərzində əlaqə saxlamaq və nəzarət etmək üçün ev telefonuna üstünlük verirlər. Bu tendensiyanı yaşlı və gənc nəsil üzrə ayırmaq düzgün olmaz. Çünki artıq əksəriyyət görüntülü və səsli internet zənglərindən rahat şəkildə istifadə edirlər. Buna görə də çoxu ev telefonuna görə aylıq abunə haqqının ödənilməsini lazımsız hesab edir. Digər tərəfdən, abunə haqları son illərdə bahalaşıb. Əgər 4-5 il əvvəl aylıq 2 manat ödənilirdisə, indi bu məbləğ 4 manata qədər yüksəlib”.

Sosioloq bildirib ki, bir çox yerli ATS-lərin rəqəmsal sistemə keçidi də ev telefonlarından imtinaya gətirib çıxaran səbəblərdəndir:

“Elektrik enerjisi olmadıqda ev telefonları da işləmir və insanlar bu xidmətin artıq praktik olmadığını düşünür. Əgər ev telefonları əvvəlki kimi ənənəvi, yəni enerjidən asılı olmayan sistemlə işləsəydi, azalma olmazdı. İndi isə evdə bir neçə nəfərin smartfon istifadə etməsi və görüntülü, audio zəng imkanlarının olması ev telefonuna ehtiyacı tamamilə aradan qaldırır. Nəticədə, bu xidmətdən imtinalar kütləviləşir”.