NATO-nun Baltik ölkələrinin hava məkanını patrul etmə missiyasında iştirak edən Macarıstanın "JAS 39 Gripen" qırıcıları Latviyanın sərhədlərinə yaxınlaşan beş rus hərbi təyyarəsini tutmaq üçün təcili uçuş həyata keçiriblər.

Publika.az xəbər verir ki, bu barədə “Hərbi icmal” portalı məlumat yayıb.

Baltik dənizi üzərində, Latviyanın sahillərinə yaxın ərazidə beş naməlum təyyarə aşkar edilib. Qərb mənbələri bildirir ki, onların beynəlxalq uçuş qaydalarına riayət edib-etmədiyi hələ də məlum deyil. Litvada yerləşən Şyaulyay aviabazasında dislokasiya olunmuş Macarıstan qırıcıları hədəfləri operativ şəkildə müəyyənləşdirib və Rusiya təyyarələri NATO-nun məsuliyyət zonasını tərk edənə qədər onları müşayiət ediblər.

Qeyd olunub ki, macar pilotlar Rusiya təyyarələrini nişana alıblar ki, bu da kifayət qədər ciddi hadisə sayılır.

Bu, artıq bir həftə ərzində ikinci belə hadisədir. 23 sentyabrda həmin təyyarələr Litva sərhədləri yaxınlığında tutma əməliyyatı həyata keçiriblər. Rusiya təyyarələri vizual identifikasiyadan sonra kurslarını dəyişiblər və missiya heç bir insident olmadan başa çatıb.