Türkiyə hökuməti CHP-nin İstanbul ofisinin qarşısını blokadaya alıb. CHP İstanbul Gənclik Qolunun çağırışının ardından partiyanın İstanbuldakı Baş Qərargahının qarşısında gərgin anlar yaşanıb. Əraziyə çoxlu sayda çevik qüvvət qrupları göndərilib, polis qərargahı mühasirəyə alaraq ora gedən yolları bağlayıb. CHP rəsmiləri ilə polis arasında mübahisə düşüb.

Proseslər Türkiyənin ana müxalifət partiyası CHP-nin ləğvinə doğru gedir?

Globalinfo.az-a danışan politoloq Qabil Hüseynli deyib ki, CHP-nin İstanbul qərargahının polis tərəfindən mühasirəyə alınması və ərazidə baş verən gərginliklər Türkiyədə siyasi vəziyyətin son dərəcə kritik mərhələyə keçdiyini göstərir:

“Hadisə təkcə bir hüquq-mühafizə əməliyyatı deyil, həm də siyasi münasibətlər sistemində yaranan ciddi çatların göstəricisidir. CHP Türkiyənin ana müxalifət partiyası olmaqla yanaşı, respublikanın qurucu ideologiyasını təmsil edən ən köklü siyasi təşkilatdır. Buna görə də hadisəyə sadəcə “təhlükəsizlik tədbiri” kimi baxmaq mümkün deyil. Bu cür sərt addımlar, xüsusilə də müxalifətin güclü olduğu İstanbul kimi bir mərkəzdə baş verirsə, artıq siyasi güc nümayişidir. Mesaj aydındır: hakimiyyət CHP-yə qarşı daha sərt davranmaq niyyətindədir və buna cəmiyyətin reaksiyasını yoxlayır”.

Politoloq qeyd edib ki, bu, eyni zamanda, CHP-nin təşkilati fəaliyyət imkanlarının məhdudlaşdırılması və ya onun küçə dəstəyinin zəiflədilməsi cəhdidir:

“Bu cür taktikalar daha geniş və uzunmüddətli bir siyasi strategiyanın, yəni müxalifəti sistematik şəkildə zəiflətmək və ya tamamilə sıradan çıxarmaq cəhdinin bir parçası ola bilər.

Hazırda CHP-nin ləğvi hüquqi baxımdan masada görünmür. Amma bu tip hadisələr ictimai legitimliyin zəiflədilməsi ssenarisinin hissəsi ola bilər. Əgər bir siyasi təşkilat ictimaiyyətdə radikal, təhlükəli və ya qeyri-sabit qüvvə kimi təqdim olunarsa, onun ləğvi sonrakı mərhələlərdə daha asan əsaslandırıla bilər”.