İran parlamenti Zəngəzur dəhlizi ilə bağlı sərt bəyanat qəbul edib. Sənəddə qeyd olunub ki, bu dəhliz İranın təhlükəsizliyinə təhdiddir, ölkənin geosiyasi mövqeyini zəiflətmək məqsədi daşıyan istənilən iqtisadi və tranzit layihə Parlament Assambleyası tərəfindən rədd edilir. Bəyanatda həmçinin, “İran milli təhlükəsizliyi və maraqlarına qarşı hər hansı hücum baş verəcəyi təqdirdə qətiyyətli müdafiə üçün bütün siyasi, hüquqi və qanuni vasitələrdən istifadə etmək hüququnu özündə saxlayır”, – fikri vurğulanır.

Maraqlıdır ki, İran Prezidenti Məsud Pezeşkian dəhlizin ölkəsi üçün təhlükə yaratmadığını söyləmişdi. Tehran hökumətindəki fikir ayrılığı ciddi narahatlıq doğurur və dəhlizin təhlükəsizliyi ilə bağlı bir sıra sualları meydana çıxarır.

Globalinfo.az-a danışan siyasi şərhçi Cavanşir Abbaslı deyib ki, İranda Zəngəzur dəhlizi ilə bağlı ikitirəlik yaranıb:

“Prezident Məsud Pezeşkianın mövqeyi məlumdur, sadəcə ali lider tərəfi dəhlizin açılmasına qarşıdır. Onların dirəniş mövqeyi avqustun 8-də Ağ Evdə ABŞ Prezidenti Donald Trampın Azərbaycan Prezidenti İlham Əliyev və Ermənistanın Baş naziri Nikol Paşinyanla görüşündən sonra daha da güclənib. Rusiyanın da bu görüşdən sonra sağa-sola doğru əyildiyini görürük. Amma bütün səylər əbəsdir. Artıq dəhlizin açılması prosesi getdikcə yaxınlaşır.

İran ABŞ-ın regionda artan rolunu qəbul edə bilmir. Avqustun 8-dən əvvəl cənub qonşumuzda yumşalma müşahidə olunurdu, lakin Vaşinqton görüşü hər şeyi dəyişdi. Ümumiyyətlə, Tehran dəhliz məsələsində heç nəyə nail ola bilməyəcək və hazırda təklənmiş vəziyyətdədir. İsraillə 12 günlük müharibədə ən yaxın müttəfiqi olan Rusiya belə İrana dəstəyini göstərmədi, sadəcə quru bəyanatlarla kifayətləndi. Halbuki hər kəs İsrailin arxasında ABŞ-ın dayandığını bilirdi və bunu Tehran da etiraf etdi. Azərbaycan tərəfi isə mövqeyini dəyişməyib. İranın belə vəziyyətdə qiymət verməsini gözləmək real deyil”.

Siyasi şərhçi bildirib ki, Tehran rejiminin əvvəllər də Azərbaycanın ərazisindən İrana zərbə endirilməsinə imkan verilməyəcəyi kimi mövqe sərgiləməsinə baxmayaraq, bu dəfə Zəngəzur dəhlizi açılacaq və ondan istifadə edən dövlətlərdən biri də İran özü olacaq:

“Sadəcə cənub qonşumuz Naxçıvana birbaşa gediş-gəlişin təmin olunması ilə barışmaq istəmir. Lakin bu da boşuna cəhd olacaq. Azərbaycan Prezidenti İlham Əliyevin Əl Ərəbiyyə kanalına verdiyi müsahibədə səsləndirdiyi fikirlərdən sonra molla rejiminin belə bəyanatlarla nəticə əldə edə bilməyəcəyi açıq görünür. Lakin düşünürəm ki, Tehran bir müddət sonra yorulacaq. Azərbaycan isə işini davam etdirəcək”.