“Cənubi Qafqazda yaranan problemlərin həlli baxımından 3+3 formatlı əməkdaşlıq platforması (Azərbaycan, Ermənistan, Gürcüstan – Rusiya, Türkiyə, İran) daha funksional vasitəyə çevrilə bilər”.

Globalinfo.az xəbər verir ki, bunu İran Prezidenti Məsud Pezeşkian Rusiya lideri Vladimir Putinlə telefon danışığı zamanı deyib.

Pezeşkianın sözlərinə görə, Ermənistanın Baş naziri Nikol Paşinyan onun İrəvana səfəri zamanı əmin edib ki, ABŞ və Azərbaycanla keçirilən son təmaslarda İranla Rusiyanın maraqları nəzərə alınıb. İran Prezidenti bu faktı əsas gətirərək qeyd edib ki, 3+3 formatı çərçivəsində aparılan dialoqların daha məhsuldar olacağına inanır və bu modelin təkmilləşdirilməsi üçün Rusiyanın iştirakı vacibdir.

Qeyd edək ki, altı ölkəni birləşdirən bu təşəbbüs ilk dəfə 2020-ci ilin sonunda Azərbaycan və Türkiyə prezidentləri tərəfindən irəli sürülüb. Rusiya və İran bu ideyanı dəstəkləyib, Ermənistan isə formata qoşulub. Gürcüstan isə Rusiya ilə münasibətlərinə görə bu platformada iştirak etməyi düşünmədiyini bildirib.