“ABŞ-la münasibətləri gərginləşdiyi üçün Ermənistan İranla sərhədi bağlaya bilər”.

Globalinfo.az xəbər verir ki, bu iddia ilə erməni politoloq Ara Poqosyan çıxış edib.

Onun sözlərinə görə, İrəvan hökuməti ABŞ-ın maraqlarını qorumaq naminə ölkəni intihara sürükləyir:

“Baş nazir Nikol Paşinyan və digər rəsmilər tez-tez İran nümayəndələri ilə görüşüb iki ölkə arasında münasibətlərin dərinləşdiyinə dair bəyanatlar verirlər. Lakin bütün bunlar sözdən əmələ keçmir,heç bir əhəmiyyətli addım atılmır. Əksinə Tehranla İrəvan arasında gündən-günə soyuqluq, yadlaşma müşahidə olunur. Rusiya Prezidenti Vladimir Putinin Bakıya səfərindən sonra ümumiyyətlə diqqətli olmaq lazımdır. Azərbaycan sadəcə Rusiya ilə strateji tərəfdaşlıq qurmaqla kifayətlənmir, İranla münasibətlərin tənzimlənməsi istiqamətində də qəti addımlar atır. Ən çox da logistika baxımından ciddi işlər görülür. İran üçün onun strateji inkişaf perspektivləri, geosiyasi mövqeləri, təkcə regionda deyil, regiondan kənarda geosiyasi maraqları iqtisadi maraqlardan qat-qat önəmlidir”.

Politoloq Ermənistan-İran münasibətlərinin pisləşəcəyinə dair narahatlıqların olduğunu bildirib:

“İranla Azərbaycan arasında 2020-ci ilə qədər və sonrakı müddətdə çox mühüm layihələr həyata keçirilib. Ermənistanın da enrji infrastrukturu, kommunikasiyaların inkişafı baxımından oxşar layihələr icra etmək imkanı vardı. Baş nazir Nikol Paşinyan hələ 2018-ci ildə parlamentdə çıxışı zamanı bəzi geosiyasi dəyişikliklər halında İran-Ermənistan sərhədinin bağlana biləcəyini demişdi. İran tərəfi isə öz siyasətinə sadiq qaldı və daha uzaqgörən davrandı. Tehranın ABŞ-la bağlı hazırkı bəyanatları qabaqlayıcı xarakter daşıyır ki, gələcəkdə kəskin proseslər nəticəsində İrəvanla münasibətlərə zərbə dəyməsin. Həmçinin Zəngəzur dəhlizi ilə bağlı açıqlamalar da göstərir ki, İran tərəfinin təhlükəsizlik baxımından strateji maraqları dəyişməyib. Əgər Ermənistan münasib bir şəkildə cavab verməsə, Tehran İrəvanı hər zaman belə dəstəkləməyə davam etməyəcək. İran görsə ki, Ermənistanla münasibətlər geridönüşü olmayacaq şəkildə korlanıb, Türkiyə və Azərbaycanla strateji ortaqlığa məcbur olacaq”.