Türkiyə prezidenti Rəcəb Tayyib Ərdoğan İran prezidenti Məsud Pezeşkian ilə telefon danışığı aparıb.

Publika.az Türkiyə mətbuatına istinadən xəbər verir ki, danışıq zamanı İsrail–İran arasında artan gərginlik, regional və qlobal məsələlər müzakirə olunub.

Ərdoğan bölgədəki qarşıdurmanın tezliklə dayandırılması və nüvə danışıqlarına qayıdılması üçün Türkiyənin vasitəçi rol oynamağa hazır olduğunu bildirib.

O qeyd edib ki, İsrail və İran arasındakı münaqişəli vəziyyətlə bağlı digər liderlərlə də təmaslar qurulur.

Ərdoğan həmçinin Türkiyənin regionda sülh və sabitliyin qorunmasına önəm verdiyini vurğulayıb. Bu, iki lider arasında baş tutan ikinci telefon danışığı olub.

Türkiyə prezidenti daha sonra Rusiya prezidenti Vladimir Putinlə də telefon danışığı aparıb. Danışıq zamanı İsrail və İran arasında münaqişə, ikitərəfli münasibətlər və regional məsələlər müzakirə olunub.

Putin də danışıq zamanı münaqişələrin tez bir zamanda dayandırılması və diplomatiyaya yer açılması məsələsində Ərdoğanla həmfikir olduğunu bildirib.