Azərbaycan Prezidenti İlham Əliyevin mövcud geosiyasi proseslər fonunda Türkiyəyə səfəri maraqla qarşılandı. Xüsusilə ölkə başçılarının verdiyi bəyanatlar, Bakı və Ankara arasında dostluq, həmçinin müxtəlif sahələr üzrə əməkdaşlıq münasibətlərinin vurğulanması diqqət çəkir.

Bəzi ekspertlər Azərbaycan Prezidentinin Ankaraya səfərini, o cümlədən Türkiyə Prezidenti Rəcəb Trayyib Ərdoğanla birgə açıqlamalarını yeni bir mərhələnin başlanğıcı kimi dəyərləndirirlər. Liderlərin səmimi münasibəti, mətbuata yansıyan görüntüləri müxtəlif beynəlxalq güc mərkəzlərinə mesaj olaraq qəbul edilir.

Globalinfo.az-a danışan politoloq İlyas Hüseynov deyib ki, Türkiyə ilə Azərbaycan arasında tarixən birlik-bərabərlik, qardaşlıq olub:

“Ümumilli lider Heydər Əliyevin də dediyi kimi, biz bir millət, iki dövlətik. Bu şüar əsasında inkişaf edən münasibətlər Şuşa Bəyannaməsi ilə müttəfiqlik səviyyəsinə çatıb.

Azərbaycan ilə Türkiyə bir çox sahədə yüksək əlaqələrə malikdir. Fikrimcə, xüsusilə qeyd edilməli olan istiqamətlər enerji və hərb sahələridir. Təsadüfi deyil ki, ölkə başçısının Ankaraya səfərində əsas məqsəd İğdır-Naxçıvan qaz kəmərinin açılış mərasimi ilə bağlı idi. Bu, iki ölkənin enerji siyasəti və Avropaya qaz nəqli məsələsində atdığı ən böyük addımlardandır.

Ümumiyyətlə, geosiyasi vəziyyət sürətlə dəyişir. Bakı-Ankara ortaqlığı bu proseslər fonunda xüsusilə strateji hal alıb. Prezident Rəcəb Tayyib Ərdoğanın çıxışında iki ölkənin dostluq münasibətlərini qeyd etməsi diqqət çəkdi. Əslində, bu, bir daha Azərbaycan üçün təhdid yaradacaq amillərə, güclərə qarşı bir mesajdır. Türkiyə hər zaman Azərbaycanın yanındadır. Düşünürəm ki, bu əməkdaşlıq gələcək perspektivdə inkişaf edəcək”.