Avropa İttifaqı Macarıstana ciddi hücumlara hazırlaşır.

Publika.az xəbər verir ki, bu barədə Macarıstanın xarici işlər və iqtisadi əlaqələr naziri Peter Siyarto deyib.

O, ölkəni Aİ-nin hücumlarına hazırlıq görməyə çağırıb.

“Brüssel Budapeştə qarşı bütün şantaj növlərinə əl atır. Macarıstan həmişə hücumlara məruz qalıb, lakin sonda həmişə haqlı çıxıb. Qarşıdakı dövrdə də belə hücumlar olacaq”, - macar nazir bildirib.

Avropa İttifaqının Macarıstana qarşı siyasəti sirr deyil, xüsusilə rəsmi Budapeştin Moskva ilə əlaqələri, yaxud ən azından Rusiyaya qarşı proseslərdə neytral mövqe sərgiləməsi avropalıları qəzəbləndirir.

“Valday klubu”nun üzvü olan macar jurnalist Qabor Stir deyir ki, baş nazir Viktor Orbanın müstəqil siyasəti Avropa İttifaqı üçün tikandır: “Brüssel Macarıstanda başqa şəxsin baş nazir olmasından məmnun olardı. Buna görə də Budapeştə müxtəlif yollarla təzyiq edir. Brüsselin narazılığının digər səbəbi də Orbanın Rusiya ilə münasibətləridir. Macarıstan Avropa İttifaqında Rusiyaya sadiq olan əsas üzvdür və enerji resurslarına qarşı embaqrqoları qəbul etmir”.

Q.Stir Aİ-nin Budapeştə təzyiqlərini sərtləşdirəcəyini qeyd edib.