“İran həmişə Cənubi Qafqazda gedən proseslərdə fəal rol oynayıb, həm Azərbaycan, həm də Ermənistanla sıx əlaqə saxlayır”.

Globalinfo.az xəbər verir ki, bunu İran Xarici İşlər Nazirliyinin sözçüsü İsmayıl Bəqayi deyib.

Bəqayi İranın regiondankənar güclərin Cənubi Qafqaza müdaxiləsinə qarşı olduğunu bildirib:

“İran–Ermənistan münasibətləri, xüsusən də qısa, lakin etibarlı ümumi sərhədlərinə görə çoxillik dostluq və əməkdaşlığa əsaslanır. İran iqtisadi inkişaf üçün regional kommunikasiya yollarının genişləndirilməsini alqışlamaqla yanaşı, bu tədbirlərin beynəlxalq hüququ, sərhədləri, milli suverenliyi və geosiyasi strukturları pozmamalı olduğunu vurğulayır”.

XİN sözçüsü İran və Ermənistan arasında yüksək səviyyəli məsləhətləşmələrin aparılacağını söyləyib:

“Bizim Ermənistanla sülh sazişinin bağlanması ilə bağlı danışıqlarımız çoxdan başlayıb və bu, yeni məsələ deyil. Əvvəlki danışıqlarda biz tərəfləri sülh sazişinin imzalanmasını sürətləndirməyə təşviq etmişik. Çünki hesab edirik ki, bu saziş Qafqazda sülhün və sabitliyin bərqərar olmasında dönüş nöqtəsi ola bilər. Sabah İran və Ermənistan rəsmiləri arasında hadisələri daha ətraflı şəkildə anlamaq və mülahizələrimizi və narahatlıqlarımızı erməni tərəfi ilə bölüşmək üçün yüksək səviyyəli məsləhətləşmələr keçiriləcək”.