Yayda bir çox vətəndaşlar xarici ölkələrə səyahət etməyi planlaşdırsa da, dünyada baş verən xoşagəlməz hadisələr tərəddüdə səbəb olub. Türkiyədə meşə yanğınlarının yenidən başlaması, Rusiyada yaşanan Yekaterinburq hadisələri, eləcə də İsrail–İran münaqişəsinə görə ABŞ, Qətər kimi ölkələrin də risk altında qalması narahatlıq yaradıb.

Belə qeyri-sabit vəziyyətdə Azərbaycandan kənara çıxmaq nə dərəcədə məntiqlidir? Hazırkı geosiyasi durumu nəzərə alaraq, vətəndaşlara bu yay xarici ölkələrə səyahət etmək tövsiyə edilirmi?

Globalinfo.az-a danışan politoloq Yalçın Hacızadə deyib ki, dünyanın sürətlə sülhdən uzaqlaşması, münaqişə və müharibələrin artması səyahət etmək istəyənlər üçün təhlükə yaradır:

“Keçən ilin sonlarında ölkəmizə məxsus mülki təyyarə Rusiya səmalarında raketlə vuruldu, 38 nəfər həlak oldu. Ukrayna müharibəsində uzaqmənzilli raketlərdən və dronlardan istifadə belə bir halın yenidən yaranması ehtimalını daha da artırır. Son zamanlar Yaxın Şərqdə gərginliyin şiddətlənməsi, İran və İsrailin biri-birinə qarşı min kilometrləri keçən silahlardan yararlanması bəzi ölkələrin hava səmasının bağlanması ilə nəticələnmişdi. Bütün bunlar hava və su vasitələri ilə səyahətə getmək istəyənlərdə qorxu və risk yaradır”.

Politoloq Rusiya və Türkiyədə baş verən hadisələrə diqqət çəkib:

“Rusiyada miqrantlara və qeyri-rus olan millətin nümayəndələrinə qarşı dövlət orqanları, eləcə də kriminal ünsürlərin cinayətkar hərəkətləri, qardaş ölkədə meşə yanğınları və bəzi dövlətlərin mütamadi terror xəbərdarlığı ilə bağlı öz vətəndaşlarının səyahətdən çəkindirən bəyanatları səyahət sevərlər üçün məhduddiyyət yaradır. COVID-19 pandemiyasından sonra quru sərhədlərimizin bağlı olması daxili turizmin inkişafına səbəb olub. Lakin xidmət və restoran sektorunda qiymətlərin yüksək olması, bəzi hallarda sui-istifadələrin baş alıb getməsi insanları daha əlverişli – Balkan ölkələrinə səyahət etməyə istiqamətləndirir. Bu baxımından Azərbaycanda qiymət və xidmət sektoruna nəzarət gücləndirilməli, vətəndaşların ölkədə təhlükəsiz şəraitdə istirahətinə şərait yaradılmalıdır”.