ABŞ Prezidenti Donald Tramp bəzi ölkələrə səyahət qadağası qoya bilər.

Globalinfo.az xəbər verir ki, bu barədə “Nyu York Tayms” qəzeti iddia irəli sürüb.

Məlumata görə, hökumət ABŞ-a səyahət qadağaları və ya məhdudiyyətlər tətbiq edəcək yeni tənzimləmə üzərində işləyir:

“Yeni qadağa Trampın ilk prezidentlik dövründə verdiyi qərardan daha əhatəli olacaq. Burada Vaşinqtonun milli təhlükəsizliyə təhdid olaraq gördüyü bəzi ölkələr “qırmızı”, “narıncı” və “sarı” olaraq təsnif ediləcək”.

Nəşr bildirib ki, “qırmızı” kateqoriyasına daxil olan ölkə vətəndaşlarının ABŞ-a səyahətinə qadağa qoyulacaq. “Narıncı”da ölkələrə məhdudiyyətlər yer alacaq. “Sarı” kateqoriyasındakı ölkələrə isə çatışmazlıqlarını tamamlamaq üçün 60 gün vaxt veriləcək:

“”Narıncı” və “sarı” ölkələrlə bağlı təfərrüat verilməsə də, “qırmızı” ölkələr arasında Trampın əvvəlki səyahət qadağasında yer alan İran, Yəmən, Liviya, Somali, Sudan, Suriya, Şimali Koreya, Kuba və Venesuela olacaq. Bunlara Əfqanıstan və Pakistanın da əlavə ediləcəyi bildirilir”.

Qeyd edək ki, Donald Trampın ilk prezidentliyi dövründə ABŞ-ı terror hücumlarından qorumaq səbəbi ilə səyahət qadağası qoyması uzun müddət mübahisələrə səbəb olmuşdu.