ABŞ-ın Ankaradakı səfiri Tomas Barrak “Anadolu” agentliyinə verdiyi son müsahibəsi ilə beynəlxalq medianın diqqətini çəkib. Onun Türkiyə və F-35 qırıcı təyyarələri ilə bağlı verdiyi açıqlamalar həm İsrail, həm də Yunanıstan mediasında geniş əks-səda doğurub.

Publika.az xəbər verir ki, Barrak xüsusilə Türkiyənin F-35 proqramına yenidən qatılması məsələsinə toxunub və bu fikirlər regionda müzakirələrə yol açıb.

İsrailin "hmnews.il" saytı xəbəri “Türkiyə nəhayət F-35 yoluna girdi” başlığı ilə təqdim edib.

Məlumata görə, Barrak müsahibəsində ABŞ prezidenti Donald Tramp ilə Türkiyə prezidenti Rəcəb Tayyib Ərdoğan, eləcə də xarici işlər nazirləri Marko Rubio və Hakan Fidan arasında olan yaxın münasibətlərə toxunub. O, bu şəxslər arasında qurulan etimada əsaslanan dialoqun bölgədə yeni əməkdaşlıq imkanları yaratdığını bildirib.

Yunanıstan mətbuatı da məsələyə biganə qalmayıb. “Para Politika” nəşri böyükelçinin sözlərini “İl bitmədən anlaşma mümkündür” başlığı ilə təqdim edib. “Sigma Live” isə “ABŞ Konqresi F-35 məsələsində mövqeyini yenidən qiymətləndirir” manşetini verərək, CAATSA sanksiyalarının ləğvi və Türkiyənin proqramdakı iştirakının bərpası ilə bağlı Barraka ünvanlanan suallara onun “Birmənalı olaraq bəli” cavabı verdiyini qeyd edib.

Barrak, həmçinin Türkiyəni NATO üçün həyati tərəfdaş adlandırıb və F-35 təyyarələrinin bir çox əsas detallarının artıq Türkiyədə istehsal edildiyinə diqqət çəkib.

İsrailin “Maariv” nəşri isə xəbəri “F-35-ləri alacaq növbəti ölkə Türkiyə ola bilər” başlığı ilə təqdim edərək, Barrakın Türkiyənin Yaxın Şərqdə tarazlıq yaradan mühüm aktor olduğunu dediyini vurğulayıb.

Səfirin sözlərinə görə, Türkiyənin F-35 proqramına dönüşü ilə bağlı danışıqların yaxın zamanda yenidən başlaması mümkündür və bu istiqamətdə ilin sonuna qədər ABŞ-Türkiyə arasında razılaşma əldə oluna bilər.