Böyük Britaniyanın Baş naziri Kir Starmer ölkəsinin müharibə hazırlığı rejiminə keçdiyini açıqlayıb. O bu addımın Rusiya təhdidinə qarşı atıldığını söyləyib. Starmer vəziyyətin təhlükəli olduğunu bildirib və ölkəsinin müharibəyə hazırlıqlı olmasının vacibliyini vurğulayıb. Son zamanlar Rusiyanın qonşusu Finlandiya və İsveçlə münasibətlərinin gərginləşməsi, həmçinin Ukrayna müharibəsinə görə Avropa İttifaqı və NATO ilə yaşadığı qarşıdurma fonunda bu addım xüsusi diqqət çəkib.

Londonun bu hazırlığının səbəbi nədir? Ukrayna müharibəsinin miqyası genişlənə bilərmi?

Globalinfo.az-a danışan poltioloq Aytən Qurbanova deyib ki, Britaniyanın müharibə hazırlığı rejiminə keçməsi, eləcə də Rusiyanın Avropa İttifaqı və NATO ilə yaşadığı qarşıdurma Kreml üzərində çəkindirici təsirləri hədəfləsə də, müharibənin miqyasını genişləndirəcək nəticələrə də səbəb ola bilər:

“Xüsusilə Ukraynanın həyata keçirdiyi “Hörümçək toru” əməliyyatının Rusiyada ehtimal əks-sədası fonunda belə bəyanatların səsləndirilməsi Kremli danışıqlar prosesi ilə bağlı daha çevik addımlar atmağa sövq etməsi mümkündür. Amma hadisələrin inkişaf xronikası göstərdi ki, Kremlin geri çəkilmək və ya güzəştə getmək niyyəti yoxdur. Belə olan halda digər ssenarilərin reallaşması ehtimalı daha yüksəkdir.

Bu ssenarilər arasında ən dəhşətli nəticələri özündə ehtiva edən məqam isə məhz Rusiyanın nüvə potensialından istifadə etməsi ilə bağlı ehtimaldır. Ona görə düşünürəm ki, Böyük Britaniyanın bu hazırlığı çəkindirici təsirlərdən çox, Rusiyanın aqressiv cavab reaksiyası ilə müşayiət oluna bilər.

Nəticə etibarilə, müharibəyə son qoyulması ilə bağlı danışıqların gündəmdə olduğu bir mərhələdə hərbi cəbhədə ifrat güc istifadəsinin mümkün dağıdıcı nəticələri heç bir halda istisna edilməməlidir. Bu da Rusiya-Ukrayna müharibəsinə yaxın gələcəkdə son qoyulması ilə bağlı gözləntiləri mümkünsüz edir”.