Ukraynada müharibənin sona çatdırılması üçün danışıqlar davam etsə də, ciddi nəticənin əldə olunmaması narahatlıq doğurur.

Müharibənin ilk günündən bu yana, son olaraq isə İstanbul görüşündə fəallığı ilə seçilən Türkiyə bir müddət öncəyə qədər tərəflər arasında vasitəçi rolunda mühüm aktor kimi çıxış edirdi. Lakin son zamanlar bəzi ekspertlər Ankaranın bu prosesə gözlənilən qədər müsbət töhfə verə bilmədiyini deyirlər.

ABŞ və Rusiya liderlərinin öncədən razılaşmalarına baxmayaraq İstanbul görüşünə qatılmaması, sadəcə Ukrayna Prezidenti Volodimir Zelenskinin Ankaraya gedərək türkiyəli həmkarı Rəcəb Tayyib Ərdoğanla görüşməsi bu baxımdan diqqət çəkir.

Türkiyənin danışıqlardakı effektivliyi zəifləyib? Rusiya-Ukrayna münaqişəsinin həlli üçün necə bir yol izlənməlidir?

Globalinfo.az-a danışan politoloq Məhəmməd Əsədullazadənin sözlərinə görə, Türkiyənin xarici işlər naziri Hakan Fidanın Moskva səfərindən sonra Kiyevdə də danışıqlar aparması Ankara tərəfinin diplomatik təşəbbüslərini davam etdirdiyini göstərir:

“Türkiyə Rusiya və Ukrayna liderlərinin bir araya gəlməsində, eyni zamanda atəşkəsin əldə olunmasında maraqlıdır. Görünür, Ankaranın yeni sülh təşəbbüsü üçün planı var. Lakin vasitəçilik cəhdlərinin yaxın perspektivdə uğurla nəticələnəcəyi ehtimalı aşağıdır.

Bu müharibə lokal münaqişədən daha çox, Rusiyanın Qərbə qarşı geosiyasi üstünlük əldə etmək məqsədilə başladığı genişmiqyaslı qarşıdurmadır.

Moskva ilkin şərtlərin qəbuluna nail olmadan müharibəni dayandırmayacaq. Kreml geosiyasi mövqelərini gücləndirməyə, təsir zonası formalaşdıraraq yeni bir qütb yaratmağa çalışır. Bu səbəbdən də danışıqlar prosesi ilə paralel olaraq müharibəni davam etdirir. Rusiyanı yalnız Avropa İttifaqı və ABŞ-ın ciddi hərbi-siyasi təzyiqləri dayandıra bilər. Hazırkı mərhələdə aparılan diplomatik danışıqların isə effektli nəticələr verməsi çətindir”.