Dünya liderlərinin bir-birinin ardınca Azərbaycana səfəri ölkəmizin regional roluna və artan nüfuzuna bir daha diqqət çəkir. Aprelin 28-də İran Prezidenti Məsud Pezeşkianın səfəri bir çox detalla yadda qaldı.

Həmçinin may ayının 8-də İsrailin Baş naziri Benyamin Netanyahunun da Bakıya gələcəyi bildirilir. Maraqlıdır ki, eyni ayda Türkiyə Prezidenti Rəcəb Tayyib Ərdoğanın da Azərbaycana səfəri gözlənilir, lakin onun dəqiq tarixi açıqlanmayıb.

Mayın 9-da isə Azərbaycan Prezidenti İlham Əliyevin Rusiyaya yola düşəcəyi, faşizm üzərində Qələbənin 80 illik yubileyinin qeyd edilməsi məqsədilə Qızıl Meydanda keçiriləcək hərbi parada qatılacağı açıqlanıb. Ekspertlərin fikrincə, artan geosiyasi müzakirələr və nəzərdə tutulan regional iqtisadi layihələrin həyata keçirilməsi planı fonunda Rusiya Prezidenti Vladimir Putinin yaxın aylarda ölkəmizə səfəri mümkündür.

Əliyev Moskvaya səfər çərçivəsində Putini Azərbaycana dəvət edə bilərmi?

Globalinfo.az-a danışan siyasi şərhçi Əli Zülfüqaroğlu deyib ki, Azərbaycan istər regional, istərsə də qlobal siyasi arenada mühüm aktora çevrilib:

“O da aydındır ki, bu uğurlar Azərbaycanın diplomatik fəaliyyətinin nəticəsidir. Bilirsiniz ki, Bakı ilə Tehran arasında bir müddət münasibətlərdə gərginlik yaşanırdı. Lakin Azərbaycan uğurlu və məqsədyönlü diplomatiya sayəsində bu münasibətləri normallaşdırmağa və inkişaf etdirməyə nail oldu. Təbii ki, münasibətlərin müsbət yöndə inkişafı həm Azərbaycanın, həm də İranın maraqlarına uyğundur.

Diqqətçəkən digər məqam isə Türkiyə Prezidenti Rəcəb Tayyib Ərdoğan və İsrailin Baş naziri Benyamin Netanyahunun Azərbaycana gözlənilən səfərləri ilə bağlıdır. Azərbaycan və Türkiyə qardaş ölkələrdir və Prezident İlham Əliyevlə Prezident Rəcəb Tayyib Ərdoğan arasındakı sıx dostluq əlaqələri və siyasi iradə nəticəsində iki ölkə arasında münasibətlər tarixdə görünməmiş səviyyəyə yüksəlib”.

Ə.Zülfüqaroğlu bildirib ki, Azərbaycan-İran münasibətləri də hazırda müsbət istiqamətdə inkişaf edir:

“Eyni zamanda Azərbaycanın İsraillə də yaxın və fəal əlaqələri mövcuddur. Bu siyahıya Rusiya, Ukrayna, ABŞ, Böyük Britaniya, Çin və digər ölkələri də əlavə etmək olar – baxmayaraq ki, adı çəkilən ölkələr arasında münasibətlər çox zaman gərgin xarakter daşıyır. Məsələn, Rusiya-Ukrayna, ABŞ-Ukrayna, ABŞ-Britaniya, Rusiya-Britaniya, ABŞ-Çin münasibətləri bu gün ciddi ziddiyyətlər fonunda davam edir.

İran və İsrail düşmən münasibətindədir. Ankara ilə Təl-Əviv arasında isə son zamanlar gərginlik yaşanır və bu, qarşıdurma riski yaradır. Eyni zamanda, Türkiyə ilə İran arasında da münasibətlər soyuqdur və xüsusilə Yaxın Şərq mövzusunda ciddi fikir ayrılıqları var. Bütün bu çətin geosiyasi mənzərəyə baxmayaraq, Azərbaycanın üç ölkə – İran, İsrail və Türkiyə ilə münasibətləri yüksək səviyyədə inkişaf edir. İran prezidentindən sonra Türkiyə və İsrail liderlərinin də Bakıya səfərləri gözlənilir. Bu isə Azərbaycanın güclü və balanslı diplomatiyasının göstəricisidir”.

Siyasi şərhçi əlavə edib ki, diplomatik güc ölkənin strateji mövqelərinin möhkəmlənməsində əsas faktordur:

“Azərbaycan kiçik ölkə olsa da, uğurlu xarici siyasəti nəticəsində beynəlxalq miqyasda əhəmiyyətli aktora çevrilib. Qlobal problemlərin həllində körpü rolunu oynamaq potensialına malikdir. Bu da Azərbaycanın etibarlı dost və strateji tərəfdaş kimi qəbul edilməsinə zəmin yaradır. Hazırda dünyanın məhz bu cür vasitəçilərə ehtiyacı var”.