Ermənistanın Baş naziri Nikol Paşinyan 9 May – Faşizm üzərində Qələbə Günü münasibətilə Moskvada keçiriləcək hərbi parad və tədbirlərə qatılacaq, lakin səfərin təfərrüatları gizli saxlanılır.

Globalinfo.az xəbər verir ki, bu barədə “Joxovurd”un məqaləsində qeyd olunur.

Nəşr yazır ki, hələ martın 14-də baş nazirin Rusiyaya gedəcəyi və qələbə tədbirlərinə qatılacağı təsdiqlənib. Məlumata görə, baş nazirin həmin gün Moskvaya gedib, axşam İrəvana qayıdacağı, yaxud orada qalacağı məlum deyil. Çünki Paşinyan son illərdə Rusiyaya səfəri zamanı orada gecələməyib. Bu dəfə isə vəziyyət fərqlidir, çünki baş nazir bu səfərlə həm də Kremlin etimadını yenidən qazanmaq istəyir.

Qəzetin məqaləsində qeyd olunur ki, Paşinyanın səfər çərçivəsində kimlərlə görüş keçirəcəyi də məlum deyil. Əgər o, gecə Moskvada qalıb ertəsi gün ölkəsinə qayıdacaqsa, bu, bir sıra vacib müzakirələrdə iştirak edəcəyi mənasına gəlir. Rusiya Prezidenti Vladimir Putin və Azərbaycan Prezidenti İlham Əliyevlə təkbətək görüş keçirib-keçirməyəcəyi isə dəqiq deyil. Amma bununla bağlı müəyyən iddialar var. Həmçinin üç ölkə liderinin danışıqlar aparması da gözlənilir.

Bütün bunların fonunda isə Ermənistanın baş nazirinin əsas məqsədi Moskvada yenidən inam qazanmaqdır. Çünki ABŞ-ın yeni hökuməti və Avropadan vəd edilən, gözlənilən dəstəyi ala bilmir. Eyni zamanda həmin qüvvələrin irəvana diqqəti də azalıb. Buna görə də Paşinyan Kremlin etimadını qazanmağa və növbəti seçkilərdəki qalibiyyətinə zəmanət almağa çalışır.