Ermənistanın baş naziri Nikol Paşinyanın Estoniyaya rəsmi səfəri birmənalı qarşılanmır.

Publika.az xəbər verir ki, Ermənistan mediası bu səfəri Qərbin münasibətini yumşaltmaq məqsədi daşıdığını yazır.

Paşinyan 9 may Qələbə paradında iştirak etmək üçün Moskvaya səfər edəcək. Avropa İttifaqı Moskvada keçiriləcək Qələbə paradına isti yanaşmır. Avropa İttifaqının xarici əlaqələr və təhlükəsizlik siyasəti üzrə ali komissarı Kaya Kallas daha öncə bildirmişdi ki, Aİ üzvlüyünə namizəd olan ölkələr Moskvadakı hərbi paradda iştirak etməməlidir. Latviyanın xarici işlər naziri Baiba Braje isə bu qadağanı pozanlara qarşı sanksiyaların tətbiq edilə biləcəyinə eyham vurmuşdu. Ermənistan Aİ-yə üzv olmaq istəyir, artıq bununla bağlı qanun layihəsi qəbul edilib.

Bu halda Paşinyanın Moskvaya səfəri Aİ-də xoş qarşılanmayacaq. Ermənistanın baş naziri də Qərbə sadiqliyini nümayiş etdirmək və Moskvadakı hərbi paradda iştirak etmək məcburiyyətində qaldığını izah etmək məqsədilə Estoniyaya səfər edib. Aİ-nin xarici siyasətinə rəhbərlik edən Kallas daha əvvəl Estoniyanın baş naziri olub.