Ermənistanın Baş naziri Nikol Paşinyan bəyan etdi ki, yeni konstitusiyanın mətnində artıq müstəqillik bəyannaməsinə istinad olmamalıdır. Bu bəyannamə 1990-cı ildə qəbul edilib və orada keçmiş “Dağlıq Qarabağ”ın Ermənistana birləşdirilməsinin zəruriliyi vurğulanır. Amma müstəqillik bəyannaməsindəki iddialarla bağlı heç bir şərh verilmir.

Mövzu ilə bağlı Teleqraf-a açıqlamasında politoloq Ramiyə Məmmədova Paşinyanın son açıqlamalarının erməni cəmiyyətini prosesə hazırlamaq cəhdi kimi dəyərləndirib.

Onun fikrincə, N.Paşinyan "Azərbaycan tələb edir deyə, Ermənistan konstitusiyasında dəyişiklik edirik" kimi mövqe sərgiləməkdən çəkinir: "Ermənistanın gələcəyi məhz bu reallıqdan asılıdır. Qonşularına qarşı ərazi iddiası fonunda dövlət qurmaq mümkün deyil. Azərbaycanla yanaşı, Türkiyəyə qarşı da ərazi iddiaları fonunda regionda qalıcı sülhün olması real deyil”.

Politoloq hesab edir ki, Ermənistanın gələcəyi, Zəngəzur dəhlizinin açılması və regional proseslərdə iştirakı üçün ilkin şərtlər təmin olunmalıdır: “Konstitusiyadakı iddiaları aradan qaldırıb Azərbaycanla sülh müqaviləsi imzalandıqdan sonra bölgəyə sülhün gələcəyinə əminlik var. Burada kənar faktorlar da nəzər alınmalıdır. Bəzi qərb ölkələrinin Ermənistandakı səfirlərinin son zamanlar Azərbaycanla şərti sərhəddə görünməsi heç də təsadüfi deyil. Onlar mümkün qədər tərəflər arasında sülhün əldə olunmamasına çalışır. İstəkləri odur ki, bölgədə yenidən gərginlik yaransın”.

Politoloq Fərhad Mehdiyev isə Ermənistan konstitusiyası ilə bağlı fərqli yanaşmaların olduğunu söyləyib.

O qeyd edib ki, konstitusiyada Ermənistanın müstəqillik bəyannaməsinə istinadən aradan qaldırılması Azərbaycanın tələbinin yerinə yetirilməsi deməkdir: “Yəni, müstəqillik bəyannaməsi ləğv olunmasa belə, qanunlar və normal iyerarxiyada müstəqillik bəyannaməsi parlamentin bir aktıdır. O parlamentin aktı olduğuna görə, beynəlxalq müqavilədən üstün sayılmır. Ona görə də heç vaxt demək olmaz ki, beynəlxalq müqavilə etibarsızdır. Əsas odur ki, konstitusiya müstəqillik aktına istinad etməsin. Bu halda heç bir problem qalmır”.

Siyasi şərhçi Asif Nərimanlı isə hesab edir ki, konstitusiya ilə bağlı Paşinyanın açıqlaması Azərbaycanın istəyinə uyğundur.

Onun fikrincə, rəsmi Bakının İrəvandan tələbi odur ki, konstitusiya dəyişdirilsin: “Orada Azərbaycana qarşı ərazi iddiaları var. Ərazi iddiaları da məhz müstəqillik bəyannaməsinə istinad üzərində qurulur. Müstəqillik bəyannaməsində qeyd edilir ki, “Qarabağ Ermənistana birləşdirilməlidir və Ermənistan dövləti də bunu bir vəzifə kimi yerinə yetirməlidir”. Bu baxımdan konstitusiyanın dəyişdirilməsi Ermənistanın Azərbaycana qarşı ərazi iddiasından rəsmi şəkildə imtina etməsi deməkdir”.

Asif Nərimanlı Ermənistanın müstəqillik bəyannəməsinin dəyişdirilib-dəyişdirilməyəcəyi mövzusunun isə açıq qaldığına diqqət çəkib: “Konstitusiya dəyişdirilsə belə, müstəqillik bəyannaməsində Azərbaycana qarşı iddiaların qalması təhlükəlidir. Çünki Ermənistan dövlətinin əsas ideyası müstəqillik bəyannaməsinə söykənir. Bu reallıq tələb edir ki, müstəqillik bəyannaməsi də dəyişdirilsin. Azərbaycan da haqlı olaraq əvvəlcədən Ermənistan konstitusiyası və digər hüquqi aktları dəyişdirilməlidir tələbini qoyub. Yəni, digər normativ hüquqi aktlar dedikdə konstitusiya ilə yanaşı, müstəqillik bəyannaməsi də daxildir. Ermənistan Azərbaycana qarşı ərazi iddialarından imtina etmək istəyirsə, konstitusiyası ilə yanaşı, müstəqillik bəyannaməsini də dəyişdirilməlidir”.