TASS-ın Rusiyanın təhlükəsizlik orqanlarında adı açıqlanmayan mənbəyinə istinadən yaydığı məlumat diqqət çəkib. Ukrayna Silahlı Qüvvələrinin çox böyük itkilər verməsinə baxmayaraq, bir neçə döyüş qrupunu Sum vilayətindəki Yunakovkadan Kursk vilayətinin Oleşnya ətrafına köçürməyə çalışdığı bildirilir.

Mənbənin sözlərinə görə, Ukrayna ordusu rus qüvvələrinin Sum vilayətində irəliləməsinə, Yunakovka, Loknya və Belovodı qəsəbələrini işğal etməsinə mane olmağa cəhd göstərir.

Globalinfo.az-a danışan siyasi şərhçi Kənan Novruzov deyib ki, əslində, Ukrayna çoxdan Rusiya ərazisinə soxulmağa çalışır:

“Məsələn, Kursk istiqamətində Ukraynanın əməliyyatları da bu cəhdin tərkib hissəsi idi. Həmin əməliyyat bəlkə də hərbi baxımdan effektiv olmadı, amma istənilən halda nəticəsiz qalmadı. Ukraynanın Rusiya ərazisinə daxil olmasının əsas səbələrindən biri müharibə ağrısını rus xalqına da yaşatmaq və insanlarla iqtidarı üz-üzə qoymaqdır.

Beləliklə Kiyev, diqqəti yayındırıb işğal altındakı ərazilərdə hərəkətə keçə bilər”.

Ekspertin sözlərinə görə, Ukrayna mümkün ərazi mübadiləsinə hazırlaşır.

“Ümumiyyətlə bu addım gözlənilən idi. ABŞ-ın iştirakı ilə Rusiya və Ukrayna arasında danışıqlar perspektivinin güclənməsi Avropanın maraqlarına uyğun deyil, çünki müharibənin bitməsini istəmir.

Müharibə başa çatarsa, Rusiya xüsusilə regionda ona qonşu olan ölkələr üçün yeni təhdid yaradacaq. Heç rəsmi Kiyev də danışıqları istəmir. Savaş bitərsə, Ukrayna itirəcək. Bu isə Prezident Volodimir Zelenski hakimiyyətinin sonu deməkdir. Odur ki, Avropadan silah alan Ukrayna danışıqlar perspektivini azaldır, müharibəni genişləndirir. Proses davam edəcək”.