Rus ordusunun yanvarın 18-də ballistik raketlərlə Ukraynanın paytaxtı Kiyevə hücumu yanğınlar və insan tələfatına səbəb olub. Səhər erkən saatlardan baş verən hücum nəticəsində azı 3 nəfərin öldüyü bildirilir.

Bu məsələ hazırda ABŞ-ın vasitəçiliyi ilə sülh razılaşmasının əldə olunması istiqamətində aparılan prosesə zərbə kimi qiymətləndirilir. Rusiyanın birbaşa paytaxt Kiyevi və oradakı mülki obyektləri hədəfə alması müharibədə “qırmızı xətlər”in keçilməsi olaraq qəbul edilib.

Globalinfo.az-a danışan siyasi şərhçi Kənan Novruzov deyib ki, Rusiyanın Ukraynaya ballistik raketlərlə hücumu ilk belə hal deyil:

“Əvvəllər də oxşar hadisələr olub. Bu mənada Moskvanın hansısa “qırmızı xətlər”i keçdiyini demək olmaz. Sonrakı müddətdə də oxşar cəhdlər ola bilər. Hər halda Rusiyanın ballistik raket ehtiyatı kifayət qədərdir.

Bu hücumlar Ukrayna xalqının iradəsini qırmağa və insanları hazırkı Prezident Volodimir Zelenski iqtidarı ilə üz- üzə qoymağa hesablanıb. İndiki məqamda sözügedən hücumu həm də Ukraynanın Rusiyanın Kursk vilayətində fəallaşması ilə əlaqələndirmək olar. Amma fikrimcə, bu cəhdlər uğursuz olacaq. Ukrayna xalqı artıq müqavimət yolunu seçib və hücumlara öyrəşib”.