Ukrayna ordusunun Kursk istiqamətində böyük hücuma keçdiyi ilə bağlı məlumatlar yayıldıqdan dərhal sonra, Rusiya müdafiə nazirinin müavini, ordu generalı Yunus-Bek Yevkurov Kursk vilayətinə səfər etdi. Bir müddət əvvəl Ukrayna prezidenti Volodimir Zelenski qeyd etmişdi ki, ABŞ və Fransa ukraynalı hərbçilərə təlimlər keçirir. Hətta Ukrayna əsgərlərinin Rusiya ilə döyüş qabiliyyətinin bərabər olduğu haqqında da fikirlər səsləndirilir.

Globalinfo.az-a danışan siyasi şərhçi Əziz Əlibəyli deyib ki, Kursk üzərində gərginlik uzun müddətdir davam edir:

“Rusiya Kurska bütöv halda əməliyyatların tərkib hissəsi kimi və Ukrayna ordusuna qarşı yönəlmiş tələ kimi baxdığından dərhal silib süpürülməsində maraqlı deyil. Çünki Ukrayna üçün o bölgələrdə kommunikasiyanı qurmaq çox çətindir. Rusiyanın daxili ərazi vahidlərində Ukraynanın cəbhələr açması onun lehinə deyil. Avqust ayında Ukraynanın Kurska girməsi də heç bir nəticə vermədi.

Doğrudur, Ukrayna əsgərləri təlim keçir. Yeni silahlardan istifadə qaydasını mənimsəyirlər və s. Lakin Rusiyanın da müəyyən potensialı var. Bunun isə müharibəyə necə təsir edəcəyini yekunda görəcəyik.

Ukrayna Kurskda çox böyük xərclər hesabına savaş aparır. Bəlkə də Rusiyanın istəyi elə budur. Rəsmi Kiyev Rusiya daxilində savaş aparmaqla ictimai rəyi Rusiya Prezidenti Vladimir Putinə qarşı çevirmək idi. Lakin bu baş vermədi”.