Azərbaycan və Ermənistan arasında sülh prosesində mühüm mərhələlərdən biri olan ATƏT-in Minsk qrupunun ləğvi məsələsi yenidən gündəmə gəlib. Azərbaycanın xarici işlər naziri Ceyhun Bayramov Türkiyədə keçirilən tədbir zamanı bu məsələyə xüsusi diqqət çəkərək, sülh sazişinin imzalanması üçün Minsk qrupunun fəaliyyətinə rəsmi son qoyulmasının vacibliyini vurğulayıb.

Paralel olaraq, Ermənistanın xarici işlər naziri Ararat Mirzoyan da öz çıxışında bu mövzuya toxunub. O, sülh sazişi və Minsk qrupunun ləğv sənədinin eyni gündə, cəmi 10 dəqiqəlik fasilə ilə imzalanmasını təklif edib.

Minsk qrupu sülh sazişi ilə eyni gündə ləğv edilə bilərmi? Hüquqi baxımdan bu, mümkündürmü?

Globalinfo.az-a danışan siyasi şərhçi Asif Nərimanlı bildirib ki, Ermənistanın xarici işlər naziri Ararat Mirzoyanın son açıqlaması daha çox ritorik xarakter daşıyır və real proseslərə təsir imkanına malik deyil:

“ATƏT-in Minsk qrupunun fəaliyyətinin tam şəkildə ləğvi prosesi yalnız Azərbaycan və Ermənistanın bu yöndə birgə müraciətindən asılıdır. Yəni əgər tərəflər ATƏT-ə rəsmi şəkildə müraciət etsələr, bu məsələ təşkilatın gündəminə çıxarıla bilər və prosedura uyğun olaraq müzakirələr başlanar. ATƏT-də bütün qərarlar yekdillik əsasında qəbul edildiyinə görə, bu, sadə və sürətli bir proses deyil. Belə bir qərarın qəbul edilməsi üçün müvafiq iclas keçirilməli, tərəflər arasında məsləhətləşmələr aparılmalı və yekun sənəd hazırlanmalıdır”.

Asif Nərimanlının fikrincə, Ermənistan bu mərhələdə sülh prosesində öz mövqelərini qorumağa çalışır:

“Hazırda Ermənistan sülh müqaviləsini 17 maddə çərçivəsində imzalanması istiqamətində Azərbaycanla razılığa gəlməyə çalışır. Rəsmi İrəvan Bakının irəli sürdüyü digər əsas şərtləri – xüsusilə də Ermənistan konstitusiyasının dəyişdirilməsi və ATƏT-in Minsk qrupunun ləğvi məsələlərini arxa plana keçirməyə və bu tələbləri gündəmdən salmağa çalışır. Halbuki Prezident İlham Əliyev dəfələrlə bəyan edib ki, 17 maddədən əlavə, Ermənistan sülhə nail olmaq üçün bu iki vacib şərti də yerinə yetirməlidir”.

Siyasi şərhçi qeyd edir ki, Ermənistan tərəfi beynəlxalq ictimaiyyətdə məqsədli şəkildə yanlış təsəvvür yaratmağa cəhd edir:

“Ermənistan sanki Minsk qrupunun ləğvi məsələsində heç bir problem görmürmüş kimi davranır və bu prosesin asanlıqla həll olunacağı təəssüratını yaratmağa çalışır. Mirzoyanın bu yöndə verdiyi açıqlamalar isə əslində ciddi siyasi mövqe deyil, sadəcə ictimai rəyi manipulyasiya etməyə hesablanmış ritorik ifadələrdir. Məqsəd beynəlxalq ictimaiyyəti Azərbaycanın haqlı tələbləri barədə yanlış məlumatlandırmaq və prosesin yönünü dəyişdirməkdir. Hüquqi baxımdan da Ararat Mirzoyanın səsləndirdiyi kimi 10 dəqiqə ərzində Minsk qrupunun ləğvi mümkün deyil”.