Martın 15-də ABŞ prezidenti Donald Tramp orduya “Ənsar Allah” (Husi) hərəkatına qarşı qətiyyətli və güclü hərbi əməliyyatlara başlamağı əmr edib. ABŞ ordusu gecə saatlarında qrupun Yəməndəki hərbi obyektlərinə hücum edib. Hücumlar nəticəsində 31 nəfərin öldüyü, 101 nəfərin yaralandığı bildirilir.

Yaxın Şərqdə növbəti böyük savaş başlayır?

Globalinfo.az-a danışan politoloq Elxan Şahinoğlu deyib ki, İkinci Dünya müharibəsindən sonra istənilən ABŞ prezidentinin hakimiyyət illərində kiçik də olsa müharibələr baş verib:

“Bu, ABŞ-ın gücünü göstərmək niyyəti daşıyır. Donald Tramp birinci hakimiyyəti illərində heç kimlə müharibə aparmayıb. Özü də müharibə əleyhinədir. Bir iş adamı kimi daha çox gəlir əldə etmək istəyir. Müharibə olan yerdə isə gəlir yox, xərclər olur. Tramp isə xərcləməyi sevən siyasətçi prezident deyil. Lakin hazırda bu addımı atmaq məcburiyyətində qalıb. Husilər gəmiçilərə böyük təhlükələr yaradırlar. İrandan da dəstək alırlar. Donald Trampın zərbə endirməkdə 2 məqsədi olub: Husilərin mövqeyini zəiflətmək və İrana təzyiqi artırmaq. Göstərməyə çalışırlar ki, rəsmi Tehran bölgədəki silahlı və terrorçu qruplaşmaları maliyyələşdirmək, hərbi texnika ilə təchiz etməkdən imtina etməzsə, eyni zərbələr ona da vurula bilər”.

Politoloqun sözlərinə görə, Tramp dünyaya öz gücünü sübut etməyə çalışır:

“Bu hücumlar Rusiya və Ukraynaya da verilmiş mesaj kimi qiymətləndirilə bilər. Onları atəşkəs təklifi ilə razılaşmağa məcbur etmək istəyir. Doğrudur, Tramp bu yolla Rusiya və Ukraynanı cəzalandırmaq istəmir. Lakin hamı onun qətiyyətini görmüş oldu.

Yaxın Şərqdə vəziyyətin gərginləşməsinə gəldikdə, bir çox ərəb ölkələri Husilərdən onsuz da narazı idi. Ona görə də ABŞ -ın bu əməliyyatı həmin ölkələrin maraqlarına cavab vermiş oldu”.