ABŞ-ın Yəməndəki husi hədəflərinə zərbələr endirməsi Yaxın Şərqdə vəziyyəti daha da gərginləşdirib. Husilər danışıqlara hazır olmaqla yanaşı bəyan ediblər ki, ABŞ dayanmasa, qruplaşma Qətər, Küveyt və Birləşmiş Ərəb Əmirliklərində olan ABŞ bazalarını vuracaq. ABŞ isə husilərin rəsmi Vaşinqtonun müttəfiqlərinə zərbə endirəcəyi təqdirdə, birbaşa İranın vurulacağını açıqlayıb.

Hazırda İran üçün təhlükə varmı? Gərginliyin nəticəsi nə olacaq?

Globalinfo.az-a danışan politoloq İlyas Hüseynov deyib ki, Tramp hakimiyyətə gəldikdən sonra özünü sülhpərvər, təhlükəsizliyin qorunmasının və əmin-amanlığın yaradılmasının əsas lideri kimi təqdim etməyə çalışır:

“Yaxın Şərq, Rusiya-Ukrayna müharibəsinin nizamlanması və dayanıqlı sülhün təmin olunması üçün fəaliyyət göstərdiyi ilə bağlı görüntü formalaşdırır.

ABŞ-ın öz strateji maraqları var. Yaxın Şərqdə əsas müttəfiqi olan İsrailin hüquqlarının, maraqlarının təminatında ABŞ yaxından iştirak edir. Bu xüsusda İranın proksi qüvvələrinin məhv edilməsi də əsas hədəfdir. Husilər də ABŞ-ı bazalarının vurulması ilə hədələyir. Burada genişmiqyaslı müharibənin başlaması ehtimalı var. Tramp danışıqlar yolu ilə dünyada sülhün, əmin-amanlığın təmin olunmasını istəsə də, Yaxın Şərq elə bir bölgədir ki, kiçik qığılcım böyük savaşa gətirib çıxara bilər.

Hazırda potensial təhlükə mövcuddur. Gərginliyin domino effekti ilə artırılması İranı proseslərə daxil edə bilər. Bu da arzuolunmazdır. ABŞ və Böyük Britaniya bu cür addımlarla nəbz yoxlayır, eyni zamanda bölgədəki vəziyyətin hara qədər dərinləşə biləcəyini öyrənir”.