Son günlər İran və İsrail arasındakı münasibətlər ciddi şəkildə gərginləşib. Yaxın Şərqdə qarşıdurmaların artması kontekstində bu gərginliyin hər an daha böyük müharibəyə çevrilə biləcəyi ehtimalı getdikcə güclənir.

Xüsusilə də, İsrailin son aylarda Livanda həyata keçirdiyi hücumlar və Tehranın regiondakı proksi güclərini ölümünə vurması vəziyyəti kritik həddə çatdırıb.

Hətta son məlumatlara görə, İsrail İrana hücum edəcəyi səbəbi ilə Tehran əhalisinə sığınacaqlarda gizlənmək üçün xəbərdarlıq edib.

İrana hücum qlobal mənada müharibənin başlanması demək olacaq? Müharibə başlayacağı təqdirdə dünya iqtisadiyyatını nə gözləyir?

Globalinfo.az-a danışan politoloq Elşad Həsənov deyib ki, İran İsrailə raket zərbəsi endirdi, indi isə növbə İsrailindir:

“İsrail bu hücuma ciddi hazırlaşır. ABŞ-ın dəstəyini gözləyir. Təl-Əviv Tehranın hərbi obyektlərini vurmağı planlayır. İsrail İranın iqtisadi rıçaqlarını məhv etmək istəyir. Hücumun nə zaman baş tutması məlum olmasa da İsrail əməliyyat planlarını hazır edib. Netanyahunun hücum əmrini gözləyirlər. İran da bu hücuma necə cavab verəcəyi ilə bağlı əməliyyatlara başlayıb. Lakin görünür, İran İsrailin atəş zərbələrinin qarşısına çətin duruma düşəcək. Əhali isə böyük zərər görəcək”.

Politoloqun sözlərinə görə, İran və İsrail bir-biri ilə müharibə aparmaq yerinə sadəcə oyun oynayırlar:

“İsrailin İran ərazisində strateji obyektlərə zərbələr endirməsi iqtisadiyyata təsirsiz ötüşməyəcək. Yanacağın qiymətində kəskin artımın şahidi ola bilərik. Belə ki, rəsmi Tehran nə qədər sanksiyalara məruz qalsa da dünya bazarına gizli yollarla ucuz qiymətə öz yanacağını satır. Bu da İranda yaranan ağır iqtisadi duruma nisbətən dəstək göstərir. Lakin sözügedən gərginlik pik həddə çatarsa, ölkə iqtisadiyyatına mənfi təsir göstərəcəyi şübhəsizdir”.