Polşa Prezidenti Anjey Dudanın ABŞ-ın nüvə silahını Varşavada yerləşdirməsi ilə bağlı son çağırışı narahatlıqla qarşılanıb. Duda bunun Rusiyanın təcavüzünə qarşı mühüm olduğunu bildirərək artıq neçənci dəfədir ki, eyni təkliflə çıxış edir.

O, Rusiyanın nüvə silahını Belarusda yerləşdirməsinə diqqət çəkib və ABŞ-ın da NATO sərhədləri üçün eyni addımı ata biləcəyini söyləyib.

Belə bir təklifin icrası nə dərəcədə mümkün görünür? ABŞ hansı halda buna razılaşa bilər?

Globalinfo.az-a danışan politoloq Şahin Cəfərli deyib ki, Polşa parlament üsulu ilə idarə olunan ölkədir:

“Yəni burada əsas icra səlahiyyəti prezidentə yox, baş nazir və onun hökumətinə məxsusdur. Polşa hökumətinin isə hələlik belə bir müraciəti yoxdur. Ölkə ərazisinə ABŞ-ın nüvə arsenalının yerləşdirilməsi haqqında qərar, ya da hər hansı rəsmi çağırış qeydə alınmayıb.

Hazırda ABŞ-ın nüvə arsenalı 5 ölkədə yerləşib: Almaniya, Niderland, İtaliya və Türkiyə. Həmin arsenalın yerinin dəyişdirilməsi, başqa ölkəyə transferi ilə bağlı ABŞ və NATO-nun xüsusi qərarı yoxdur. Digər tərəfdən, alyans genişlənməyə başlayarkən Rusiya ilə bir razılaşma əldə edildi. Belə ki, NATO-ya yeni üzv olan ölkələrin ərazisində nüvə silahı yerləşdirilməyəcək. Bu qərar hələ də qüvvədədir. Bir sıra səbəblərə görə ABŞ-ın Polşa ərazisində nüvə silahı yerləşdirməsi real deyil”.

Politoloq bildirib ki, Polşa ərazisində ABŞ-ın 10 mindən artıq hərbi kontingentinin mövcud olması da nəzərə alınmalıdır:

“Bu, kifayət qədər başlı-başına Polşanın təhlükəsizliyi üçün qarantdır. Həmçinin Varşava NATO-nun 5-ci maddəsindən istifadə edə bilər. Sözügedən maddəyə əsasən, Polşaya hücum olarsa, kollektiv təhlükəsizlik prinsipi işə düşəcək. Yəni nəticə olaraq bu ölkə özünü ikitərəfli formada qarantiyə alıb.

Lakin Prezident Anjey Dudanın narahatlığı da başadüşüləndir. Xüsusilə Donald Trampın ABŞ prezidenti seçilməsindən sonra bu qarantın aradan qalxa biləcəyini düşünür. Lakin ümumiyyətlə ABŞ-ın nüvə silahını bu ölkədə yerləşdirməsi mümkün görünmür”.