Nüfuzlu “The Times” nəşrinin Britaniya hökumətindəki mənbəyə istinadən yaydığı məlumat Ağ Evdə son baş verənlər fonunda müzakirələrə səbəb olub. İddialara görə, Böyük Britaniya ABŞ-la münasibətlərini düzəltməsi üçün Ukraynaya təzyiq göstərir.

Ukrayna Prezidenti Volodimir Zelenskinin martın 1-də Londona səfəri müddətində Britaniya hökumətinin ona “oyunu qaydalarına görə oynamağı” tövsiyə etdiyi bildirilib. Həmçinin Zelenskinin danışıqlar masasına qayıtması və ABŞ Prezidenti Donald Trampa hörmətlə yanaşması ilə bağlı çağırış edilib.

Ümumiyyətlə, Ukrayna prezidenti Londonda Avropa liderlərinin iştirakı ilə keçirilən sammitdən nə ilə dönür? Kiyev üçün artıq qərar verilib?

Globalinfo.az-a danışan politoloq Zeynal Əmrəliyev deyib ki, Londonda baş tutan sammit elə əvvəldən gözlənildiyi kimi keçdi:

“Ukrayna Avropadan real dəstək ala bilmədi. Bu, bir daha Avropanın ABŞ-a möhtac olduğunu göstərir. Sammitin yekun nəticəsinə əsasən, qəbul ediləcək sülh bəyanatının ilk olaraq ABŞ Prezidenti Donald Trampa göndərilməsi razılaşdırılıb. Buna səbəb Vaşinqtonun Ukraynaya göstərdiyi yardımı Avropa ölkələrinin edə bilməməsidir.

İlk növbədə Ukrayna məhz ABŞ-ın verdiyi uzaqmənzilli silahlarla Rusiyanın dərinliklərinə zərbələr endirib müəyyən uğurlar qazana bilirdi. Kiyevin bu günə qədər keçirdiyi ən böyük əməliyyat olan Kurs planında da əsas rolu məhz ABŞ tərəfindən verilən silahlar oynayıb. Həmçinin maliyyə yardımı məsələsində də Vaşinqton ilk sıradadır. Avropa ölkələri yaxşı başa düşürlər ki, ABŞ-ın Ukraynaya verdiyi maddi dəstəyi özləri təkbaşına təmin edə bilməyəcəklər”.

Politoloqun sözlərinə görə, hazırda Avropanın iqtisadi vəziyyəti yaxşı deyil:

“İttifaq məhz iqtisadi məsələlər baxımından böhran keçirir. Onların Ukraynaya real dəstək vermək gücü yoxdur. Əgər Kiyev Çindən və Ərəb ölkələrindən istədiyi yardımı bilərsə, müharibəni bir qədər də davam etdirməsi mümkün olar. Ancaq istənilən halda tez bir zamanda Rusiya ilə danışıqlar başlamalı və atəşkəs imzalanmalıdır. Əks halda, bu, Ukrayna üçün fəlakət olacaq”.