Rusiya Təhlükəsizlik Şurasının sədr müavini Dmitri Medvedyevin son açıqlaması diqqət çəkib. Belə ki, o, ABŞ Prezidenti Donald Trampın dünyanın gözündən pərdə asdığını, əslində isə Ukraynaya dəstəyi davam etdirməyə hazır olduğunu, Putinlə bu cür davranmaqla oyun oynadığını bildirib.

Bu qənaət Rusiya elitasında hardandır?

Globalinfo.az-a danışan politoloq Natiq Miri deyib ki, Donald Trampın Rusiya ilə müəyyən mənada oyun oynadığına dair Kremldə narahatlıq var:

“Hazırda ABŞ Rusiyanı qismən gücləndirməklə Çinin əlavəsinə çevrilməkdən xilas edir. Rusiyanı Çindən ayırmaqla rəsmi Pekini təkləmək və iqtisadi , ticari sanksiyalarla əlavə vergi rüsumlarını artırmaq, nəticədə Çini öz bölgəsində sıxışdırmağı hədəfləyir. Çünki Çin yumşaq güclə öz sərhədlərini çoxdan aşıb. Hətta Panama kanalı, ABŞ-ın burnunun yaxınlığına qədər bir çox yerlərə maliyyə cəhətdən sirayət edib. Bu da Çinin qlobal səviyyədə çox ciddi təsir imkanlarının olduğundan xəbər verir. Rusiya və Çin bunun fərqindədir. Hazırda Rusiya Medvedyevin dili ilə ABŞ rəhbərliyinin diqqətinə çatdırır ki, biz bütün variantları hesablayırıq. Əgər ABŞ həqiqətən də Rusiya ilə oyun oynayırsa, bu qalibiyyətlə nəticələnməyəcək. Verilən mesaj budur.

Bir tərəfdə Putin-Tramp telefon danışıqları, Ər-Riyadda hər iki ölkənin nümayəndə heyətlərinin görüşü və bu görüşdə Rusiyanın böyük eyforiyaya qapılması, bəzi siyasətçilərin dünyanın bölüşdürülməsi haqda razılığa gəlindiyi ilə bağlı fikirləri bir daha sübut edir ki, Rusiya ilə oyun heç bir nəticə verməyəcək. Rusiya ayıqdır”.

Politoloqun sözlərinə görə, Donald Tramp istəsə belə nəinki ABŞ-ın, heç bütövlükdə Qərb dünyasının, Avro-Atlantik məkanın maraqlarını Rusiyaya təhvil verə bilməz:

“Buna ABŞ çevrəsində imkan verməzlər. ABŞ-da Donald Trampın reytinqi sürətlə aşağı düşməkdədir. Ukrayna Prezidenti Volodimir Zelenskini diktator adlandırdıqdan sonra bu vəziyyət daha geniş vüsət alıb. Hər kəsə məlumdur ki, Zelenskinin reytinqi Donald Trampın qalib gəldiyi seçki nəticələrindən daha üstündür. ABŞ və Rusiya Ukraynada prezident seçkilərinin keçirilməsini istəyir. Lakin müharibə gedən ölkədə seçkilərin keçirilməsi doğru deyil. Bu toplumu, ölkəni parçalayacaq addım olardı. Rusiyanın da əsas marağı bundadır”.